مەملەكەتتٸك قىزمەت – ەكسپەريمەنت الاڭى ەمەس. بۇل تۋرالى پرەزيدەنت قاسىم-جومارت توقاەۆ «Qazaqstan» تەلەارناسىنا بەرگەن سۇحباتىندا ايتتى, دەپ حابارلايدى "ۇلت اقپارات".
«نەگٸزٸ, كادر مەسەلەسٸن ٶتە كٷردەلٸ, ٶتە ماڭىزدى ەرٸ نەزٸك مەسەلە دەپ ايتۋعا بولادى. راسىندا, كٶپ نەرسە بٸلٸكتٸ كادرلارعا بايلانىستى. مەنٸڭ باستامام بويىنشا پرەزيدەنتتٸك جاستار كادرلىق رەزەرۆٸ قۇرىلدى. كادرلىق رەزەرۆكە ٶتكەن ازاماتتار بٸرتٸندەپ جاۋاپتى قىزمەتكە تاعايىندالىپ جاتىر. ەرينە, مۇنىمەن شەكتەلۋگە بولمايدى. باسقا دا ادامدارعا جول اشۋىمىز كەرەك», - دەدٸ مەملەكەت باسشىسى.
پرەزيدەنت مەملەكەتتٸك قىزمەتشٸلەرگە قويىلاتىن تالاپ ٶتە جوعارى بولۋعا تيٸستٸگٸن باسا ايتتى.
«كەز كەلگەن ادام بٸردەن مينيستر نەمەسە ەكٸم بولا سالمايدى. ول انىق نەرسە. بٸراز ۋاقىت, مول تەجٸريبە كەرەك. ونداي لاۋازىمعا بٸلٸمدٸ, بٸلٸكتٸ, قىزمەتٸنە ادال ازاماتتاردى تاعايىنداعان جٶن. بۇرىنعى مامانداردىڭ بەرٸن جۇمىستان شىعارۋ دۇرىس بولماس ەدٸ. ورىسشا «پوليتيچەسكايا چيستكا», ياعني «ساياسي تازالاۋعا» بارۋدىڭ قاجەتٸ جوق. مەملەكەتتٸك باسقارۋ سالاسىنا بٸرتە-بٸرتە جاڭا ماماندار كەلەدٸ. كەلٸپ تە جاتىر. بۇل – قالىپتى ٷدەرٸس. بٸراق, بٸر نەرسەنٸ ەستە ۇستاعان جٶن. مەملەكەتتٸك قىزمەت – ەكسپەريمەنت الاڭى ەمەس! سوندىقتان بۇل جۇمىستى بٸرتە-بٸرتە جٷرگٸزەمٸز», - دەدٸ ول.
