QR Prezidenti Qasym-Jomart Toqaev meditsina mamandaryna alǵys bildirdi, dep habarlaidy "Ult aqparat".
«Koronavirýsty anyqtaý, naýqastardy emdeý jáne virýstyń odan ári taralmaýy úshin aianbai eńbek etip jatqan dárigerlerge alǵys aitamyn. Úkimet osyndai qyzmetkerlerge syiaqy berý sharalaryn qabyldaidy», - dep jazdy Memleket basshysy Twitter-de.
Buǵan deiin Q.Toqaev tótenshe jaǵdaiǵa bailanysty qashyqtan jumys isteýge kóshýdi tapsyrǵan bolatyn.
«TJ rejiminde qoǵamnyń tirshiligin qamtamasyz etetin, qaýipsizdik pen quqyqtyq tártipti baqylaityn mekemelerden, jekelegen BAQ-tan ózge memlekettik, kvazimemsektor qyzmetshileriniń 70%-yn qashyqtan jumys isteýge kóshirgen jón. Jeke kásiporyndarǵa da osyndai sharany qoldaný usynylady», - dedi Prezident.
Eske salaiyq, koronavirýs infektsiiasynyń taralýyna bailanysty Qazaqstanda 16 naýryz ben 15 sáýir aralyǵynda tótenshe jaǵdai engizildi.
Al 19 naýryzdan bastap infektsiia tirkelgen eki qalada - Nur-Sultan men Almatyda karantin rejimi engiziledi.
17 naýryz, saǵat 19.00-degi jaǵdai boiynsha, Almaty qalasynda infektsiiaǵa shaldyqqan – 15, Nur-Sultan qalasynda - 18 adam, jalpy 33 naýqas tirkeldi.
