Foto: Aqorda
Memleket basshysy «Qazaqstan Respýblikasynyń keibir zańnamalyq aktilerine mindetti áleýmettik meditsinalyq saqtandyrý jáne meditsinalyq qyzmetter kórsetý máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyna qol qoidy, dep habarlaidy Ult.kz.
Zańnyń mátini baspasózde jariialanady.
Qazaqstanda mindetti áleýmettik meditsinalyq saqtandyrý (MÁMS) júiesin jetildirýge baǵyttalǵan jańa zań qabyldandy. Qujatqa sáikes, 2026 jyldan bastap áleýmettik jaǵdaiy daǵdarystyq (D) jáne shuǵyl (E) deńgeidegi 1 millionǵa jýyq azamat jergilikti biýdjet esebinen MÁMS júiesine qosylady.
Bul eldegi tabysy tómen turǵyndardyń qosymsha 5%-ynyń josparly meditsinalyq kómek alý múmkindigin arttyrady. Jarnalar azamattardyń meditsinalyq kómekke naqty júginýine qarai jergilikti atqarýshy organdar arqyly tólenedi.
Sonymen qatar, resmi tirkelgen jumyssyzdardyń MÁMS jarnasyn tóleý mindeti de jergilikti biýdjetterge júkteledi. Bul sheshim jumyspen qamtý men jumyssyzdyq deńgeiin tómendetý sharalaryn qoldaýǵa baǵyttalǵan.
Búginde Qazaqstan halqynyń 82,6%-y (16,9 mln adam) saqtandyrylǵan, onyń ishinde 11,9 milliony — jeńildikke ie sanattarǵa jatady. Olar úshin jarnany memleket tóleidi. Bul memlekettiń áleýmettik jaýapkershiliginiń joǵary deńgeiin kórsetedi.
MÁMS júiesinen áli tys qalǵan 3,4 mln-ǵa jýyq adam bar. Olardyń 2,4 milliony – eńbekke qabiletti, ómir súrý deńgeii jaqsy azamattar. Bul top úshin MÁMS júiesine qosylý ońai: ai saiynǵy jarna – 4 250 teńge, jylyna – 51 000 teńge.
2027 jyldan bastap Qazaqstan tolyqqandy saqtandyrý modeline kóshýdi josparlap otyr. Bul modelde memleket, jumys berýshi jáne azamattar arasynda ortaq jaýapkershilik qaǵidaty engiziledi.
Jańa ózgerister «Halyq densaýlyǵy jáne densaýlyq saqtaý júiesi týraly» Kodekske sáikes ázirlenip, ár azamattyń áleýmettik mártebesine qaramastan ádil ári teń meditsinalyq kómek alýyna jol ashady.
«Endi eń áleýmettik osal azamattar meditsinalyq kómekti kedergisiz ala alady», – delingen resmi habarlamada.
