Prezident málimdemesinen azamattardyń densaýlyǵy ǵana emes, ekonomikalyq jaǵdaiy da baqylaýda ekenin baiqaimyz. «Habar» Agenttigi» AQ Basqarma tóraǵasynyń birinshi orynbasary Rinat Kertaev osylai málim etti, dep habarlaidy QazAqparat.
«Elimizdiń «áleýmettik baǵdarlanǵan memleket» ekenin taǵy da sezinip jatyrmyz. Táýelsizdikti alǵaly beri azamattarǵa, onyń ishinde az qamtylǵan jandarǵa júieli qamqorlyq jasalyp kelgen edi. Endi, mine jahandyq ahýaldyń kúrdelenýine bailanysty qamqorlyqty kúsheitip otyr. Prezident Qasym-Jomart Toqaev keshegi málimdemesinde azamattarǵa jáne bizneske odan ári qoldaý kórsetiletinin jetkizdi. Budan azamattardyń densaýlyǵy ǵana emes, sondai-aq ekonomikalyq jaǵdaiy da baqylaýda ekenin baiqaimyz. Eń tómengi jalaqy mólsherindegi, iaǵni 42 500 teńge kólemindegi kómek 3 millionǵa jýyq adamǵa kórsetiledi eken. Azyq-túlikti tegin alatyndardyń da qatary artady, 800 myńnan asady. Onyń ishinde jumyssyzdar da bar. Bul, bir jaǵynan, kópshiliktiń kókeiine uialaǵan azyq-túlik tapshylyǵyna qatysty alańdaýshylyqtyń negizsiz ekenin bildiredi. Shaǵyn jáne orta kásipkerlikke de salyqtyq jeńildikter jasalyp jatyr. Bulardyń qai-qaisysy da – úlken demeý», - dedi Rinat Kertaev.
Onyń aitýynsha, azamattardyń da qoǵam aldyndaǵy jaýapkershiligi baryn eske alý kerek.
«Árine, halqymyzdyń jomarttyǵy – kópke úlgi. Elbasy Nursultan Nazarbaevtyń bastamasymen qurylǵan «Birgemiz» qoǵamdyq qoryna az ýaqyttyń ishinde milliardtaǵan qarjy jinaldy. Ulttyq biznes ókilderi aǵaiyn degende aianbai kómekterin kórsetýde. Memlekettiń kúsh-jigerine qosymsha resýrstardy jumyldyrýdyń tiimdiligin biz Arys apatynda anyq sezingenbiz. Qalany qalpyna keltirýdegi halyqtyń uiymshyldyǵy taǵy bir márte tanylatyn sát týyp tur. Yntymaǵy jarasqan, tatýlyǵy bar asqan eldiń qai qiyndyqty da jeńetini – tarih kórsetken taǵylym», - dedi Rinat Kertaev.
Onyń aitýynsha, «úide otyryp, álemdi qutqarý» deitin áńgime – qazir ázil emes, shyndyq.
«Adamdar arasyndaǵy qarym-qatynas qanshalyqty azaisa, koronavirýstyń taralýy sonshalyqty tómendeidi. Sondyqtan, memleket tarapynan jasalyp jatqan sharalarǵa túsinistikpen qarap, dárigerler men quqyq qorǵaý organdarynyń barlyq saqtyq nusqaýlaryn sabyrmen ári jaýapkershilikpen oryndaǵan abzal. Mine, sonda «ýaqytsha qiyndyqtyń» ýaqytyn áldeqaida qysqartamyz dep oilaimyn. Úide bolaiyq, aman bolaiyq! #BizBirgemiz», - dedi Rinat Kertaev.
.jpeg)