Prezidenttiń «Táýelsizdik bárinen qymbat» atty maqalasynan oiǵa túigen nárse kóp. Senat depýtaty Nurtóre Júsip osylai málim etti, dep habarlaidy "Ult aqparat".
«Prezident Qasym-Jomart Toqaevtyń maqalasy elim, jurtym degen jurttyń kóńilinen shyqty dep oilaimyn. Jańa jyldyq quttyqtaýynda Memleket basshysy «elimizdi aspen de, taspen de qorǵaimyz», - degen bolatyn.
Qazaq Qazaqtyń atamekeninde otyr! Biz eshkimnen jerdi syiǵa alǵan joqpyz! Dálel jetkilikti.
«Babalardan mura bolǵan qasietti jerimiz – eń basty bailyǵymyz. Qazaqqa osynaý ulan-ǵaiyr aýmaqty syrttan eshkim syiǵa tartqan joq. Búgingi tarihymyz 1991 jylmen nemese 1936 jylmen ólshenbeidi», - dedi Memleket basshysy Qasym-Jomart Toqaev. Batyl bailam! Uqqan adamǵa – Ataly sóz!», - dedi Nurtóre Júsip.
Senator tarihymyzdy durystap alý – memlekettik másele ekenin jetkizdi.
«Bizdiń osy ýaqytqa deiin bir olqy tusymyz – Qazaqstan tarihyn tutas qamtyp jaza almaǵanymyz. Prezident osy máseleni de tap basyp aitypty.
«Qazaqstannyń akademiialyq úlgidegi jańa tarihyn jazýdy dereý bastaý kerek. Bul iske bedeldi tarihshylarymyzdy tartý qajet. Sonymen qatar, shetel aýditoriiasyna arnalǵan Qazaqstannyń qysqasha tarihyn jazyp, álemniń negizgi tilderine aýdarýdy usynamyn. Bul – qazaqtyń san ǵasyrlyq shynaiy tarihyn álemge tanytýdyń birden-bir joly», - dep jazady Prezident.
Osy rette óte bilikti jas tarihshylardy álemniń ár shalǵaiyna attandyryp, arnaiy Qazaq tarihyn zertteý men zerdeleý isine kóńil bólý kerek. Ásirese, aǵylshyn, arab, qytai, úndi, parsy jáne Eýropa elderiniń tilin jaqsy biletin jastardan maqsatty top quryp, shetel arhivterin úńgip zertteý kerek.
Tarihymyzdy durystap alý – memlekettik másele. Ulttyq sana tarihy sanany jańǵyrtýdan bastaý alady. Osyny eskerý kerek!», - dedi Nurtóre Júsip.
Onyń pikirinshe, tarihi filmder túsirý arqyly ulttyń jadyn jańǵyrtýǵa jol ashylady.
«Ultymyz talai «tar jol, taiǵaq keshýden« ótti. Qazaqtyń kórmegen qiyndyǵy, tartpaǵan taqsyreti joq. Memleket basshysy qyrǵyzdyń «Qurmanjan datqa» filmi týraly tekke aityp otyrmaǵan bolar. Prezident Eldik pen memlekettilikti sanaǵa sińirý úshin bizge tarihi filmderdiń qajet ekendigin aitty. Tarihi taqyrypqa arnap túsirilgen alty-jeti-aq film qai jyrtyqqa jamaý bolady? Prezident tapsyrmasyna sáikes, memlekettik tapsyrystyń belgili bir bóligi mindetti túrde tarihi taqyryptarǵa baǵyttalatyn bolady. Bul – óte jaqsy usynys!
Til – Táýelsizdik tuǵyry! Memlekettik til – táýelsizdiktiń bir atribýty! Osyny eskergen Prezident barsha qazaqstandyqtarǵa, onyń ishinde qazaq tilin áli jete meńgermegen otandastarǵa úndeý tastady. «Jastar aǵylshyn tilin nemese basqa da tilderdi az ǵana ýaqytta meńgere alatynyn kórip otyrmyz. Tutas býyn almasqan osy jyldarda qazaq tilin úirengisi kelgen adam ony áldeqashan bilip shyǵar edi», - dedi Prezident.
Biyl Táýelsizdigimizdiń 30 jyldyǵy. Bylaisha alsaq, az ýaqyt emes. Ózimizdiń álsiz tustarymyzdy ózimiz bilemiz. Tezirek olqynyń ornyn toltyrmaq kerek. Táýelsizdik – ulttyń baǵy! Qazaq úshin bárinen qymbat uǵym! Prezidenttiń maqalasynda Eldik murat anyq aiqyndalǵan. Nazar aýdaratyn, mán beretin memlekettik máseleler barshylyq», - dedi Nurtóre Júsip.
Senator maqaladan oiǵa túigen nárse kóp ekenin jetkizdi.
«Qazaqstannyń Tuńǵysh Prezidenti – Elbasy «Táýelsizdikti jyl sanap, ai sanap, apta sanap, kún sanap, saǵat sanap shegelei berý kerek», - degen edi bir suhbatynda.
Bizge tegeýrindi is kerek. Talap kerek. Taǵat kerek. Maqaladan oiǵa túigen nárse kóp.
Esti azamattar eldiktiń jolynda eldiń arbasyn alǵa qarai birge tartady dep esepteimin», - dedi ol.
