Memleket basshysy Qyzylorda oblysyndaǵy mańyzdy nysandardyń jobasymen tanysty, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qasym-Jomart Toqaevqa «Qorqyt ata» áýejaiynyń jańa jolaýshylar terminalynyń qurylysy jóninde baiandaldy.
Oblys ákimi Nurlybek Nálibaev jańa terminal jeke demeýshiniń qarajatyna salynyp, keiin memleket menshigine ótkiziletinin aitty. Joba quny – 20 milliard teńge. Onyń ishinde 15,7 milliard teńge – demeýshiniń áýejai qurylysy úshin bólgen qarjysy. Sondai-aq jergilikti biýdjetten áýejaidyń syrtqy injenerlik-kommýnikatsiialyq infraqurylymyn júrgizý úshin 4,3 milliard teńge qarjy bólingen.
Halyqaralyq standartqa sai bolatyn áýejaida jolaýshylarǵa qyzmet kórsetý úshin barlyq jaǵdai jasalady. Jańa terminal kelesi jyly paidalanýǵa beriledi. Nysan qoldanysqa berilgennen keiin jolaýshylar tasymaly bir saǵatta 250 jolaýshyǵa qyzmet kórsete alady. Sondai-aq túrli baǵyttarǵa ushatyn áýe reisteriniń sany artady.
Budan bólek, oblys ákimi Qyzylorda qalasynda zamanaýi úlgide salynyp jatqan avtobekettiń biyl jyl sońynda iske qosylatynyn jáne qalanyń temirjol vokzalyna da kúrdeli jóndeý jumystary júrgizilip jatqanyn jetkizdi.
Memleket basshysyna «Qyzylorda – Jezqazǵan» avtojolyn salý barysy týraly málimet berildi. Búginde Qyzylorda oblysynyń aýmaǵyna tiesili 216 shaqyrym joldyń 104 shaqyrymy jasaldy.
Sonymen qatar Prezidentke «Batys Eýropa – Batys Qytai» halyqaralyq dáliziniń Qyzylorda qalasynan Aqtóbe oblysynyń shekarasyna deiingi aralyǵyn (566 km) I sanattaǵy 4 jolaqty jolǵa aýystyrý josparlanyp otyrǵany týraly málimet berildi.
Osy rette atalǵan baǵyttaǵy jumystardyń jobalyq-smetalyq qujattamalaryn ázirleý kelesi jyldan bastalady.
Memleket basshysy qazirgi jol, shyn máninde, óte tar ekenin atap ótip, ony keńeitý jumystaryn tezirek bastaý qajettigine nazar aýdardy. Bul rette Prezident Premer-Ministrdiń birinshi orynbasary Roman Skliarǵa máseleni baqylaýǵa alý jóninde tapsyrma berdi.
Sonymen qatar Prezidentke Qyzylorda qalasynyń jańa jylý elektr ortalyǵynyń jobasy tanystyryldy.
Byltyr Energetika ministrligi túrkiialyq «Aksa Enerji Uretim AS» kompaniiasymen Qyzylorda qalasynda jańa bý-gaz qondyrǵysyn ornatý jóninde kelisimshartqa qol qoidy. Sheteldik investitsiia esebinen salynyp jatqan jańa JEO 240MVt elektr qýatyn jáne saǵatyna 277 jylý qýatyn óndire alady. Jobanyń boljamdy quny – 215 milliard teńge.
Oblys ákiminiń aitýynsha, qazir qurylysqa daiyndyq jumystary qyzý júrip jatyr. 2025 jyldyń sońyna deiin paidalanýǵa beriletin JEO qalanyń jylý jáne elektr qajettiligin tolyq qamtamasyz etip qana qoimai, artylǵan elektr energiiasyn basqa óńirlerge satýǵa múmkindik beredi.
Qazirgi qoldanystaǵy jylý elektr ortalyǵy 1964 jyly salynǵan. Birneshe ret kúrdeli jóndeý júrgizilgenine qaramastan, strategiialyq nysannyń negizgi jáne qosalqy qondyrǵylarynyń tozý deńgeii 90 paiyzǵa jetken. Sondai-aq qaladaǵy uzyndyǵy 207,7 shaqyrym bolatyn jylý jelisiniń jartysyna jýyǵy jańartýdy qajet etedi.
Memleket basshysy elimizdiń energetikalyq qaýipsizdigin kúsheitý turǵysynan bul jobanyń mańyzdy ekenin atap ótip, Úkimet pen oblys ákimdigine jylý elektr ortalyǵyn belgilengen merzimde paidalanýǵa berýdi tapsyrdy.
Buǵan qosa, Prezidentke Qyzylorda oblysy ákiminiń orynbasary, Qazaqstan Respýblikasy Prezidentiniń «Baiqońyr» keshenindegi arnaýly ókili Qairat Nurtai kosmodrom qalashyǵyndaǵy ahýal týraly baiandady. Qasym-Jomart Toqaev qalany áleýmettik-ekonomikalyq turǵydan damytý úshin Resei tarapymen tyǵyz qarym-qatynasta jumys isteý qajet ekenine nazar aýdardy.
