Qazaqstan Prezidenti kvazimemlekettik sektor sýbektilerin qurýǵa moratorii engizý týraly Jarlyqqa qol qoidy. Bul týraly Aqordanyń resmi saity habarlady.
***
Kvazimemlekettik sektor sýbektilerin qurýǵa moratorii engizý týraly
Memlekettiń kásipkerlik qyzmetke qatysýyn qysqartý jáne jekeshe sektordy damytýǵa jaǵdai jasaý maqsatynda QAÝLY ETEMIN:
1. 2020 jylǵy 31 jeltoqsanǵa deiin kvazimemlekettik sektor sýbektilerin qurýǵa moratorii engizilsin, oǵan mynalar:
1) qyzmetin áleýmettik salada jáne (nemese) eldi mekenderdiń tynys-tirshiligin qamtamasyz etý salasynda júzege asyratyn zańdy tulǵalar;
2) jumys istep turǵan zańdy tulǵalardy qaita uiymdastyrý (biriktirý nemese qaita qurý) jolymen ońtailandyrý sheńberinde qurylatyn zańdy tulǵalar;
3) jarǵylyq kapitalynda daýys beretin aktsiialarynyń elý jáne odan da az protsenti (qatysý úlesi) kvazimemlekettik sektor sýbektilerine tiesili bolatyn aktsionerlik qoǵamdar (jaýapkershiligi shekteýli seriktestikter);
4) Qazaqstan Respýblikasy Prezidentiniń tapsyrmasy jáne (nemese) kelisimi boiynsha qurylatyn zańdy tulǵalar qosylmaidy.
2. Qazaqstan Respýblikasynyń Úkimeti jergilikti atqarýshy organdarmen jáne kvazimemlekettik sektor sýbektilerimen birlesip, sondai-aq Qazaqstan Respýblikasynyń Prezidentine tikelei baǵynatyn jáne esep beretin memlekettik organdar osy Jarlyqty iske asyrý boiynsha qajetti sharalar qabyldasyn.
3. Osy Jarlyq alǵashqy resmi jariialanǵan kúninen bastap qoldanysqa engiziledi.
Qazaqstan Respýblikasynyń
Prezidenti Q.Toqaev
Nur-Sultan, Aqorda, 2019 jylǵy 3 shilde
№ 51
