Memleket basshysy Qasym-Jomart Toqaev Mańǵystaý jáne Qyzylorda oblystarynyń ákimderimen óńirlerdegi qazirgi sanitarlyq-epidemiologiialyq jáne áleýmettik-ekonomikalyq ahýaldy telefon arqyly talqylady. Bul týraly QR Prezidentiniń baspasóz hatshysy Berik Ýáli Facebook-te jazdy, dep habarlaidy "Ult aqparat".
Mańǵystaý oblysynyń ákimi Serikbai Trumov Prezidentke COVID-19 indetine qarsy kúres boiynsha qabyldanyp jatqan sharalar, sonyń ishinde, halyqqa ekpe egý jáne maldy jem-shóppen qamtamasyz etý máseleleri jóninde baiandady.
Memleket basshysy oblys turǵyndaryna ekpe salý qarqynyn arttyrý jónindegi jumystardy kúsheitýdi, sondai-aq, eńbek daýlaryn retteý jáne boldyrmaý, óndiris oryndary men munai kásiporyndaryna qyzmet kórsetetin mekeme jumysshylaryna áleýmettik qolaily jaǵdaidy qamtamasyz etý sharalaryn qabyldaýdy tapsyrdy.
Sonymen qatar Prezident Úkimetke ákimdikpen birlesip, qýańshylyq saldaryna jáne jaiylymdyq jerlerdegi shóptiń tapshylyǵyna bailanysty qalyptasqan jaǵdai boiynsha fermerler men aýyl turǵyndaryn qoldaý úshin qajetti sharalar qabyldaýdy tapsyrdy.
Qyzylorda oblysynyń ákimi Gúlshara Ábdiqalyqova Memleket basshysyna koronavirýs indetimen kúreste júrgizilip jatqan jumystar týraly esep berdi. Óńirdegi vaktsina saldyrýǵa tiisti turǵyndardyń 52 paiyzy ekpe aldy.
Sonymen qatar oblys ákimi aimaqtaǵy sý sharýashylyǵyna qatysty jaǵdaidy da baiandady. Búginde Syrdariia ózeni arqyly oblysqa sekýndyna 550 tekshe metr sý kelýde. Sharýashylyq sýbektilerine sý berý kezegi men onyń kólemin anyqtaityn jumys komissiiasy quryldy.
Oblys ákiminiń aitýynsha, Aral aýdanynda 12 shildede tótenshe jaǵdai jariialanǵan. Osyǵan bailanysty Úkimet rezervinen jáne oblystyq biýdjetten jem-shóp sýbsidiiasyna, sondai-aq, sý arnalaryn tazartýǵa jáne uńǵymalar qazýǵa qarjy bólý týraly sheshim qabyldanǵan.
Memleket basshysy Qyzylorda oblysynyń ákimine halyqty vaktsinalaýǵa qatysty aqparattyq-túsindirý jumystaryn kúsheitýdi, munai-gaz salasyndaǵy problemalardy sheshý úshin keshendi amal qarastyrýdy, sondai-aq, Qyzylorda oblysyna qarasty aýdandardaǵy zardap shekken sharýashylyq sýbektilerine jem-shóp daiyndaýdy qamtamasyz etýdi tapsyrdy.
