Prezident Qasym-Jomart Toqaev Qorǵas beketinde konteinerlerdiń tolassyz qozǵalysyn qamtamasyz etetin treking ornatýdy tapsyrdy, dep habarlaidy QazAqparat.
«Men Úkimetke shekarada – atap aitqanda, Qorǵasta naqty ornalasqan jeri, jol júrý ýaqyty, kidirister kórsetiletin konteinerler trekingin engizýdi tapsyramyn», – dedi Qasym - Jomart Toqaev sheteldik investorlar keńesiniń otyrysynda.
Onyń aitýynsha, aqparattyq júie Ózbekstanmen, Qyrǵyzstanmen jáne basqa da kórshilermen qurylatyn barlyq erkin saýda ortalyqtarynda jumys isteýi tiis.
«Qazir kólik kommýnikatsiialary Úkimet saiasatyndaǵy basymdyq bolyp tabylady. Osy baǵdarlamanyń iske asyrylýyn ózim tikelei baqylaimyn», - dedi Memleket basshysy.
Sondai-aq, Prezident sońǵy 10 jylda Qazaqstan jahandyq kólik dálizderinde qýatty infraqurylymdyq sheńber qurǵanyn eske saldy.
«2020 jyly tranzittik temirjol tasymalynyń kólemi 17 paiyzǵa ósti. Ósimniń basty faktory konteinerlik tasymal boldy. Qazaqstannyń temirjol tasymalyndaǵy áleýetin barynsha paidalanýdyń jańa mindetteri paida bolyp otyr. Byltyr 900 myńǵa jýyq konteiner tasymaldandy. Bul 2019 jylǵy kórsetkishten 32 paiyzǵa joǵary. Onyń 91 paiyzy Qytai-Eýropa, Eýropa-Qytai baǵytyna tiesili.
Temirjol, avtomobil tasymaly men qubyr arqyly tasymal boiynsha kórsetilgen qyzmetterdiń úlesi transporttyq qyzmetterdiń 67 paiyzyn qurady. Qazaqstan Aziia men Eýropa arasyndaǵy qurlyqtyq tasymaldyń mańyzdy býynyna ainaldy dep senimmen aitýǵa bolady. Qazaqstan Qytaidyń «Bir jol – bir beldeý» jahandyq jobasyn iske asyrýdaǵy mańyzdy ári jetekshi seriktesi», - dedi Qasym-Jomart Toqaev.
