Qasym-Jomart Toqaev Qorǵanys ministri Nurlan Ermekbaevty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezident – Joǵarǵy Bas Qolbasshyǵa vedomstvonyń biylǵy jyldyń birinshi toqsanynda atqarǵan jumysynyń qorytyndysy, áskerdiń jaýyngerlik daiyndyǵy men tártibi, sondai-aq, sybailas jemqorlyqqa qarsy qabyldanyp jatqan sharalar týraly baiandaldy.
Kezdesý barysynda koronavirýs indetine qarsy kúres jaǵdaiyna erekshe kóńil bólindi. Nurlan Ermekbaev áskeri meditsinanyń PTR-zerthanalarmen qamtylýy jaiynda aitty. Ministrdiń sózinshe, Nur-Sultan jáne Almaty qalalarynda eki zerthana iske qosylǵan, al Aqtaý men Semeide mobildi keshen jumys istep tur. Ofitserler men sarbazdarǵa vaktsina salý jalǵasýda. Búginde Qarýly Kúshter quramynyń 20 paiyzyna ekpe egilgen.
Ministr Memleket basshysyna «Altyn jebe» arnaiy operatsiiasy jáne «Qalqan-2021» vedomstvoaralyq keshendi oqý-jattyǵý jiyndarynyń nátijeleri, sondai-aq, ekinshi jartyjyldyqqa josparlanǵan «Otpantaý» strategiialyq oqý-jattyǵýǵa daiyndyq jóninde esep berdi.
Qasym-Jomart Toqaevqa Qazaqstannyń halyqaralyq áskeri yntymaqtastyq baǵyttary, Qarýly Kúshterdi áskeri tehnikamen jabdyqtaý, Qarýly Kúshterdiń tujyrymdamasyn damytý jumystary týraly aityldy. Sonymen qatar Otan qorǵaýshylar kúni men Jeńis kúnin merekeleýge daiyndyq barysy, 2022 jyly Qazaqstan áskeriniń qurylǵanyna 30 jyldyǵyn atap ótýdi uiymdastyrý jumystary talqylandy.
Kezdesý sońynda Joǵarǵy Bas Qolbasshy Qorǵanys ministrine elimizdiń qorǵanys qabiletin odan ári arttyrýǵa baǵyttalǵan birqatar tapsyrma berdi.
