Foto: Tengrinews.kz/Turar Qazanǵapov
Prezidenttiń Qazaqstan halqyna Joldaýyn iske asyrý úshin Konstitýtsiiaǵa 30-dan astam ózgeris engizý qajet. Bul týraly búgingi jiynda Memleket basshysynyń ózi aitty, dep habarlaidy "Ult aqparat".
«Meniń búgingi bastamalarym óte aýqymdy. Bul bastamalar elimizdiń saiasi júiesi men ákimshilik-aýmaqtyq qurylymyn edáýir ózgertedi. Ony júzege asyrý úshin Konstitýtsiianyń 30-dan astam babyna ózgeris engizý qajet. Sondai-aq, jyldyń sońyna deiin taǵy 20-dan astam zań qabyldaý kerek.
Zań jobasyn ázirlep, ony qabyldaý – edáýir ýaqyt alatyn kúrdeli jumys. Sondyqtan, oǵan asa jaýapkershilikpen qaraǵan jón. Sondai-aq, ishki-syrtqy syn-qaterlerdi muqiiat eskerýimiz kerek.
Biz Táýelsizdik jyldarynda nebir qiyndyqtan aman óttik. Syn-qaterdiń bárin eńserip, osy kúnge jettik. Endi elimizdi túbegeili jańǵyrtýǵa kiristik.
Bul kezeń almaǵaiyp ýaqytqa tuspa-tus kelip otyr. Qazirgi halyqaralyq ahýal Qazaqstanǵa da áser etetini anyq. Biraq, zaman qanshalyqty kúrdeli bolsa da, biz baǵdarymyzdan ainymaimyz. Ótkennen taǵylym alyp, keleshekke senimmen qadam basamyz.
Osy jolda jurtymyzǵa, eń aldymen, aýyzbirshilik kerek. Aqyl men sabyr, parasat pen ustamdylyq qajet. Biz ár sheshimdi muqiiat saralap, ár isti baiyppen jasaýǵa tiispiz. Otanshyldyq rýhy joǵary el kózdegen maqsatyna qalaida jetedi», - dedi Qasym-Jomart Toqaev.
