Foto: Akorda.kz
Memleket basshysy Soltústik Qazaqstan oblysyna jumys sapary aiasynda kóktemgi egis naýqanymen tanysý úshin «Daiyndyq Agro» JShS-ǵa qarasty egistik alqabyn aralap kórdi, dep habarlaidy "Ult aqparat" Aqordanyń resmi saityna silteme jasap.
Atalǵan sharýashylyq dándi, maily daqyldar ósirýmen jáne mal sharýashylyǵymen ainalysady. Ieliginde 15,8 myń gektar egistik alqaby, 4,2 myń gektar jaiylymdyq jeri bar. «Daiyndyq Agro» direktory Birjan Sháimerdenov biyl gektarynan 25 tsentner ónim alýdy josparlap otyrǵanyn aitty.
Prezident diqandardyń eksporttyq suranysy joǵary daqyldardy ósirýge beiimdelgenin atap ótip, sharýalardyń eńbegine oń baǵa berdi.
Prezidentke kóktemgi egis naýqanynyń barysy jóninde málimet berildi. Óńir basshysy Aidarbek Saparovtyń aitýynsha, egistik alqaptaryn mineraldy tyńaitqysh jetkizý, kóktemgi egis jumystaryna tehnika sailaý, diqandardy janar-jaǵarmaimen qamtamasyz etý isi josparǵa sai oryndalyp jatyr. Biyl oblys boiynsha 4,5 million gektar jerge egin egiledi, onyń ishinde 3,2 million gektarǵa – dándi, dándi-burshaqty daqyldar, 960 myń gektarǵa – maily daqyldar, 353 myń gektarǵa – mal azyǵyn, 34,1 myń gektarǵa – kartop, 6,2 myń gektarǵa – basqa da kókónis túrlerin egý josparlanǵan.
Azyq-túlik qaýipsizdigin qamtamasyz etý úshin egistik alqaptaryn ártaraptandyryp, áleýmettik mańyzy bar daqyldardy kóbirek egý máselesine udaiy nazar aýdarylady. Sońǵy jyldary oblysta qaraqumyq egý 3 ese, kartop, sábiz, oramjapyraq sekildi kókónister alqaby shamamen 1,5-2 ese artqan.
Qasym-Jomart Toqaev egistik basynda oblystyń aýyl sharýashylyǵy ónimin óndirýshilerimen áńgimelesti. Olar memlekettiń tiimdi qoldaýy nátijesinde sharýashylyqtaryn keńeitýge múmkindik alǵanyn aitty. Iri sharýashylyqtar aýyl halqyn jumyspen qamtyp qana qoimai, aýyldaǵy áleýmettik bastamalarǵa da úles qosyp keledi.
Memleket basshysy eńbek ónimdiligin arttyryp, aýyl sharýashylyǵyna jańa tehnologiialar men óndiris tásilderin engizý mańyzdy ekenine nazar aýdardy. Prezidenttiń pikirinshe, bul sharalar halyqtyń turmys sapasyn jaqsartýǵa, naqty tabysynyń artýyna yqpal etedi. Qazirgi kezde Soltústik Qazaqstan oblysyndaǵy eńbek ónimdiligi, aýyl sharýashylyǵy salasyndaǵy bir jumysshyǵa shaqqanda, 5 million teńgeni quraidy. Bul – respýblikalyq ortasha kórsetkishten áldeqaida joǵary.
Sondai-aq Prezident oblys basshylyǵyna osy baǵyttaǵy jumysty odan ári jalǵastyrýdy jáne aýyl sharýashylyǵy ónimderin óńdeý isin damytýdy tapsyrdy. Sondai-aq diqandardyń kóktemgi egis naýqanyn sátti atqarýyna tilektestik bildirdi.
Prezident oblystyń aýyl sharýashylyǵy ónimderin óndirýshilermen kezdesý barysynda EAEO qyzmetiniń basym baǵyttary jóninde pikirin bildirdi. Jýyrda Máskeý qalasynda uiymnyń kezekti sammiti ótti.
- Resei Federatsiiasymen shekara boiynda ornalasqan Soltústik Qazaqstan oblysynyń strategiialyq mańyzy zor. Resei – bizdiń seriktesimiz. Biz EAEO aiasynda da, ekijaqty deńgeide de kedergisiz saýda men taýar almasý isin qamtamasyz etý úshin turaqty kelissózder júrgizemiz. Jýyrda Máskeýde EAEO Joǵary Keńesiniń otyrysy ótti. Jiynda, eń aldymen, ózara ekonomikalyq is-áreket, integratsiia, yntymaqtastyq máselelerimen ainalysý qajettigi týraly aittyq. Saýda-sattyq kedergisiz júrgizilýi kerek. Biz biryńǵai taýar naryǵyn qurýǵa bar kúsh-jigerimizdi jumsaýǵa tiispiz. Qazaqstandyq júk tasymaldaýshylar taýardy Resei naryǵyna da, úshinshi memleketterdiń naryqtaryna da kedergisiz jáne tiimdi jetkizý úshin Resei aýmaǵyndaǵy ishki temirjol tarifteri qol jetimdi bolýǵa tiis. Taǵy da qaitalap aitamyn: EAEO, eń aldymen, ekonomikalyq integratsiiamen, sodan keiin basqa máselelermen ainalysýy kerek.
Ideologiia, bilim berý, densaýlyq saqtaý, sport, mádeniet salalaryndaǵy máseleler, árine, nazar aýdarýdy qajet etedi. Biraq basqa da platformalar bar. Onda biz barlyq tiisti eldermen tabysty yntymaqtastyq ornatqanbyz. Sondyqtan EAEO, eń aldymen, 2015 jylǵy Shartta bekitilgen mindetin oryndaidy dep senemiz. Jaqynda Belarýs Respýblikasynyń Prezidenti Aleksandr Grigorevich Lýkashenko Qazaqstanǵa odaqtas memleketke kirýdi usyndy. Men onyń áziline laiyqty baǵa berdim. Meniń oiymsha, buǵan eshbir qajettilik joq. Óitkeni basqa integratsiialyq birlestikter, sonyń ishinde, eń aldymen, Eýraziialyq ekonomikalyq odaq bar. Iadrolyq qarýǵa keletin bolsaq, bizge bul qarý qajet emes. Sebebi biz Iadrolyq qarýdy taratpaý týraly shart pen Iadrolyq qarýdy synaýǵa tyiym salý týraly shartqa qosyldyq. Biz osy halyqaralyq qujattar aiasyndaǵy mindettemelerge adal bolyp qala beremiz. Meniń oiymsha, osy keń Eýraziialyq aimaqtaǵy nemese úlken Eýraziiadaǵy yntymaqtastyq ekonomikalyq baǵyt boiynsha damýǵa tiis, oǵan biz bárimiz múddelimiz. Naqty ortaq naryq qurý kerek, – dedi Qasym-Jomart Toqaev.
