Prezident Qasym-Jomart Toqaev referendým qorytyndysy boiynsha Qazaqstan halqyna jasaǵan úndeýinde quqyq qorǵaý jáne sot júiesinde reformalar júrgiziletinin aitty, - dep habarlaidy "Ult aqparat".
"Biz adam quqyqtary men bostandyqtaryn qorǵaý júiesin keshendi kúsheitý jónindegi baǵytymyzdy jalǵastyramyz. Quqyqtyq reforma aiasynda Konstitýtsiialyq sot qaita qurylady. Azamattar osy óte mańyzdy institýt qyzmetiniń paidasyn sezinýi úshin onyń qaýlysyna jedel áreket etý tetigin engizý qajet.
Jańa ádiletti Qazaqstanda politsiia bassyzdyǵyna, biliksiz prokýrorlarǵa jáne ádiletsiz sýdialarǵa oryn bolmaýy kerek. Qoǵam quqyq qorǵaý jáne sot júiesinen naqty ózgerister kútedi. Osy jáne el damýynyń basqa da máseleleri boiynsha naqty sheshimderdi biyl qyrkúiekte Parlamenttiń kezekti sessiiasynyń ashylýynda usynamyn", - dedi Memleket basshysy.
