Foto: Akorda.kz
Memleket basshysy Qostanaida Kia avtomobilderiniń shaǵyn toraptyq óndirisin (CKD) iske qosty, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qostanai oblysyna jumys sapary aiasynda Allur avtomobil zaýytyna bardy. Qasym-Jomart Toqaevqa kásiporyn jumysy tanystyrylyp, aldaǵy jospary baiandaldy.
Zaýyt basshylyǵynyń aitýynsha, byltyr 614,2 milliard teńgeniń ónimi óndirildi. Ótken jyly zaýyt quny 21,5 milliard teńge bolatyn ónim eksporttady. Kásiporynda 2 myńnan astam adam jumys isteidi.
Allur avtomobil zaýytynyń jańadan iske qosylǵan jelisi Kia Sportage modeline arnalǵan. CKD – shanaqtardy dánekerleý, boiaý jáne qurastyrý jónindegi tehnologiialyq jumystardy júzege asyratyn shaǵyn torapty avtomobil óndirisi. Ol úshin arnaiy tsehtar ashylǵan. Kia óndirisiniń osy tehnologiialary Ortalyq Aziia men TMD boiynsha Qazaqstanda ǵana ornalasqan.
Prezident zaýytty aralaý barysynda jas jumysshylarmen áńgimelesip, olarǵa qoldaý bildirdi.
– Shyn máninde, zaýyt óte keremet eken. Taza ári óndiris mádenieti óte joǵary. Biz jańa ǵana Kia Sportage kóligin kórdik. Bul kóliktiń sapasy óte joǵary. Sondyqtan suranys joǵary bolady dep oilaimyz. Biz keleshekte investorlar shaqyryp, bul zaýytty ulǵaitamyz. Zaýyttyń bolashaǵyna bailanysty eshqandai másele joq dep oilaimyn. Jastarǵa úlken mán berip otyrmyz. Sondyqtan bári durys bolady, – dedi Qasym-Jomart Toqaev.
Zaýyt ókilderi biyl Kia Cerato shyǵaratyn CKD jelisin iske qosý josparlanǵanyn atap ótti. Sondyqtan kompaniia tehnikalyq baǵyttaǵy oqý oryndarymen turaqty jumys júrgizýdi bastaǵan. Osy rette kásiporyn basshylyǵy tehnikalyq oqý oryndarynyń stýdentteri men túlekterine arnalǵan 250 oryndyq kampýs úlgisindegi jańa zamanaýi jataqhana qurylysynyń bastalǵanyn málimdedi.
Kia Corporation prezidenti jáne bas direktory Ho Sýn Son beinebailanys arqyly sharaǵa qatysyp, avtomobil jasaý salasyndaǵy Qazaqstan-Koreia yntymaqtastyǵynyń mańyzyn atap ótti.
– Biz Qazaqstan naryǵy úshin ashylyp jatqan bolashaǵy zor múmkindikterge rizamyz. Qazaqstan ekonomikasy keń aýqymda jáne jyldam damyp keledi. Naryqtaǵy biznesimizdiń áleýeti mol ekenin kórip otyrǵandyqtan, men osy múmkindikti paidalana otyryp, el basshylyǵyna jeke biznesti damytqany úshin alǵys aitqym keledi. Biz bul úlken istiń bastamasy ǵana dep senemiz, – dedi korporatsiia basshysy.
Sonymen qatar Memleket basshysyna Qostanai oblysynyń ákimi Qumar Aqsaqalov júzege asyrylyp jatqan 3 joba men bolashaqta qolǵa alynatyn basqa da investitsiialyq bastamalar týraly baiandady.
Oryndalyp jatqan jobalardyń alǵashqysy – temir quiý tsehynyń qurylysy. Biyl iske qosylatyn kásiporynda 300 turaqty jumys orny ashylmaq. Onyń quny – 78,2 milliard teńge. Jylyna 45 myń tonna quima quiatyn joba innovatsiialyq ónim kólemin 8 paiyzǵa ulǵaitýǵa múmkindik beredi.
Júzege asyrylyp jatqan ekinshi joba – júk kólikteriniń bólshekterin shyǵaratyn zaýyttyń qurylysy. Kásiporyn 2 jyldan soń iske qosylady. 360 adamǵa turaqty jumys oryn usynatyn jobanyń quny – 82,5 milliard teńge.
