Qasym-Jomart Toqaev halyq ártisi Álibek Dinishevti «Qazaqstannyń Eńbek Eri» ataǵymen marapattady, dep habarlaidy "Ult aqparat" Aqordaǵa silteme jasap.
Memleket basshysy mádeniet maitalmanyn mereitoiymen quttyqtap, ónerge sińirgen eńbegin joǵary baǵalady. Álibek Dinishevtiń jarty ǵasyrǵa jýyq atqarǵan qyzmetine rizashylyǵyn bildirdi.
– Qazaqtyń mańdaiyna bitken eń daryndy tulǵalarymyzdyń birisiz. Bárimiz sizdi maqtan tutamyz. Qazaqstanda da, shet memleketterde de ózińizdi bilmeitin adam joq. Álemdik deńgeide sizdiń ónerińizdi bári joǵary baǵalaidy. Pedagog retinde de, qoǵamdyq jumystarda da belsendisiz. Táýelsiz elimizdiń damýyna sińirgen eńbegińiz orasan. Osy qyzmetińizdi eskere otyryp, Otandyq mádenietti damytý men mýzyka ónerin dáripteýdegi airyqsha eńbegińiz úshin joǵary dárejeli erekshelik belgisi – «Qazaqstannyń Eńbek Eri» ataǵyn berý týraly sheshim qabyldandy. Men ony laiyqty sheshim dep esepteimin, – dedi Qazaqstan Prezidenti.
Álibek Dinishev Memleket basshysyna eńbegin baǵalap, qurmet kórsetkeni úshin alǵysyn bildirdi.
– Meniń shyǵarmashylyǵymdy baǵalap, kórsetip jatqan qurmetińiz úshin alǵys aitamyn. Ózińiz aitqandai elimizdiń de, shet memleketterdiń de sahnasynda óner kórsetip kele jatqanyma 45 jyl bolǵan eken. 70 jas mereitoiyma joǵary dárejeli «Qazaqstannyń Eńbek Eri» ataǵyn berip jatyrsyzdar. Sheksiz rizashylyǵymdy bildiremin, – dedi Álibek Dinishev.
Qasym-Jomart Toqaev qabyldaý sońynda Álibek Dinishevke densaýlyq, kásibi jáne qoǵamdyq jumysyna tabys tiledi.
