Foto: Akorda.kz
Prezident "QazMunaiGaz" UK" AQ basqarma tóraǵasy Maǵzum Myrzaǵalievti qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna "QazMunaiGaz" UK" aktsionerlik qoǵamynyń byltyrǵy óndiristik jumystarynyń negizgi qorytyndysy týraly esep berilip, aldaǵy kezeńge arnalǵan jospary tanystyryldy.
Berilgen málimetke sáikes kompaniia kómirsýtekterdi óndirý, óńdeý jáne tasymaldaý boiynsha belgilengen kórsetkishterge qol jetkizdi. Biyl "QazMunaiGaz" 23 million tonnadan astam munai óndirýdi josparlap otyr.
Prezidentke Ózen ken ornyn ońaltý jóninde de esep berildi. Bul jobanyń ekonomikalyq qana emes, sondai-aq áleýmettik mańyzy bar.
Budan bólek, Maǵzum Myrzaǵaliev kompaniianyń geologiialyq qorlaryn ulǵaitý perspektivalary týraly baiandady. Onyń aitýynsha, búginde perspektivti jańa jobalarǵa investitsiia belsendi túrde tartylyp jatyr.
Memleket basshysyna "jasyl jobalardy" damytý jóninde bergen tapsyrmasynyń oryndalý barysy týraly málimet berildi.
"QazMunaiGaz" basshysy kompaniianyń kásiporyndary ornalasqan óńirlerde halyqty sapaly aýyzsýmen qamtamasyz etýge baǵyttalǵan jobalardyń júzege asyrylý barysy týraly aitty.
Kezdesý sońynda Qasym-Jomart Toqaev investitsiialyq jobalardy iske asyrýǵa qatysty birqatar tapsyrma berdi. Sondai-aq qazaqstandyq munai óńdeý zaýyttarynyń, ásirese kóktemgi egis jumystary qarsańynda úzdiksiz jumys isteýin qamtamasyz etý qajettigine erekshe nazar aýdardy.
