Foto: Aqorda
Jyl saiyn 45 memleketten shamamen 10 myń adam Qazaqstanǵa emdelý úshin arnaiy keledi. Bul elimizdegi dárigerlik kómektiń sapasy joǵary ekenin kórsetedi. Búgin Prezident Aqordada meditsina salasy qyzmetkerlerin merekesimen quttyqtap, sóz sóiledi, dep habarlaidy Ult.kz.
Memleket basshysy búginde kóptegen aýrýhanalarymyz halyqaralyq akkreditteýden ótkenin atap ótti. Neirohirýrgiia men Kardiohirýrgiia ulttyq ortalyqtary álemdik klinikalar deńgeiinde joǵary tehnologiialy meditsinalyq qyzmet kórsetedi. Qazaqstandyq dárigerler júrekke jyl saiyn myńdaǵan ashyq operatsiia jasaidy. Emdelýshilerdiń qatarynda tipti, jańa týǵan náresteler de bar.
"Elimizde organdardy transplantatsiialaý isi josparly túrde damyp keledi. Jýyrda júrek aýystyrýǵa arnalǵan júzinshi ota sátti ótti. Biyl alǵash ret bir mezette úsh adamǵa úsh donordyń búiregin toǵyspaly transplantatsiia tásilimen saldy. Ózderine sáikes keletin organdardy alý úshin patsientter bir-birine donor boldy. Mundai kúrdeli operatsiialar dúnie júzinde alty elde ǵana jasalady. Onkologiialyq aýrýlardy emdeýge sáýle terapiiasynyń ozyq ádisteri qoldanylyp jatyr. Byltyrdan beri elimizde múlde jańa baǵyt – fetaldi meditsina dami bastady. Iaǵni, bul – ana qursaǵyndaǵy sharanaǵa operatsiia jasaý degen sóz. Mundai biregei meditsinalyq kómek kóptegen balanyń dúniege deni saý bolyp kelýine múmkindik syilaidy. Sirek kezdesetin syrqaty bar adamdardy emdeý men densaýlyǵyn jaqsartýǵa erekshe mán berilýde. Memlekettiń aldynda mundai naýqastardy sheteldik qymbat dári-dármekpen qamtamasyz etý sekildi kúrdeli mindet tur. Osy oraida meniń usynysym boiynsha qurylǵan «Qazaqstan halqyna» qory úlken qoldaý kórsetip otyr", – dedi Qasym-Jomart Toqaev.
Memleket basshysy elimizdiń farmatsevtikalyq ónerkásipti damytýǵa airyqsha nazar aýdaratynyn aitty.
"Ǵalymdarymyz onkologiia, transplantologiia, neonatologiia, genetika, biomeditsina salalarynda tyń jańalyqtar ashty. Qan aýrýlaryn emdeýge otandyq preparattar qoldanylyp jatyr. Jasandy intellekt syrqattardy anyqtaý men emdeýdiń kókjiegin keńeitedi. Atalǵan perspektivti salada aitarlyqtai serpilis jasaý qajet. Iadrolyq meditsinanyń múmkindigin de barynsha paidalanǵan jón. Densaýlyq saqtaý júiesin damytý, eń aldymen, azamattardyń ál-aýqatyn kóterýge baǵyttalǵan. Óitkeni meditsinanyń deńgeii men qoljetimdiligi – eldegi ómir sapasynyń negizgi kórsetkishi, – dedi Prezident.
Qasym-Jomart Toqaev meditsina qyzmetkerlerin áleýmettik turǵydan qoldaý, olardyń mártebesin kóterý – memlekettiń negizgi mindetiniń biri ekenine toqtaldy.
"Meniń tapsyrmammen byltyrdan bastap «Qazaqstannyń eńbek sińirgen dárigeri» ataǵy berile bastady. Bul – meditsina qyzmetkerlerine degen airyqsha qurmettiń belgisi. Sońǵy 5 jylda densaýlyq saqtaý salasyndaǵy jalaqy eki esege jýyq ósti. Meditsina kadrlaryn daiarlaityn joǵary oqý oryndary men kolledjderdiń shákirtaqysy kóbeidi. Jas mamandardyń bilikti dárigerden taǵylym alyp, kásibine tez beiimdelip ketýine barynsha jaǵdai jasalýda. Jalpy, densaýlyq saqtaý isine bólinetin qarjy jyl ótken saiyn artyp kele jatyr. Biyl onyń kólemi 2,6 trillion teńgege jetti. Memleket meditsina qyzmetkerlerine qoldaý kórsete beredi. Dárigerdi halyqtyń qamqorshysy deýge bolady. Barsha jurt muny tereń túsinip, olarǵa árdaiym qurmet kórsetýge tiis. Ókinishke qarai, qoǵamda dárigerdiń jumysyna kedergi jasap, tipti, qoqan-loqy kórsetetin adamdar áli de bar. Meditsina qyzmetkeriniń qaýipsizdigine qater tóndiretin zańsyz áreketke jol berýge bolmaidy. Qoǵamdyq tártipti buzatyn osyndai adamdar mindetti túrde zań aiasynda jaýapkershilikke tartylady. Zań men tártip barlyq jerde birdei qatań saqtalýǵa tiis. Biz sonda ǵana Ádiletti ári Qaýipsiz Qazaqstandy qura alamyz. Osy oraida meditsina qyzmetkeriniń róli airyqsha", – dedi Memleket basshysy.
Prezident dárigerlerdiń eńbegi qashanda laiyqty baǵalanýy kerek ekenin aityp, meditsina maitalmandaryn memlekettik nagradamen marapattaý týraly Jarlyqqa qol qoiǵanyn jetkizdi.
Prezident Jarlyǵymen otandyq meditsinany damytýǵa qosqan eleýli úlesi jáne azamattardyń densaýlyǵyn saqtaýdaǵy qajyrly eńbegi úshin sala mamandary nagradtaldy.
