Qazaqstan Respýblikasynyń Prezidenti Qasym-Jomart Toqaev Qazaqstan kásipodaqtary federatsiiasynyń XXVI seziniń delegattaryna úndeý joldady. "Ult aqparat" Úndeýdiń tolyq mátinin jariialaidy.
***
Qurmetti sezge qatysýshylar,
Qazaqstan kásipodaqtarynyń ókilderi!
Kásipodaqtar – eńbek adamynyń quqyqtaryn qorǵaý, onyń laiyqty turmys sapasy men jumys jaǵdaiyn qamtamasyz etý jolynda mártebeli missiia atqaratyn asa mańyzdy zamanaýi qoǵamdyq institýttyń biri.
Túrli kásippen ainalysatyn eńbek adamdary – ult igiliginiń qainar kózi.
Biz eńbekti Qazaqstan qoǵamynyń negizgi qundylyǵy retinde dáripteýimiz kerek. Bul – meniń naqty ustanymym. Osyǵan bailanysty kásipodaqtarǵa erekshe mindet júkteledi.
Sizder eńbek naryǵyn qarqyndy damytý, jastardy eńbek úderisine tartý, el azamattarynyń áleýetin arttyrý turǵysynan memleketke zor qoldaý kórsetip kelesizder.
Sonymen qatar ádiletti áleýmettik memleket qurý úshin kásipodaq qyzmetiniń nysandary men ádisterin únemi jetildirip, álemde bolyp jatqan ózgeristerge orai, tiimdi is-qimyl strategiialaryn ázirleý qajet.
Sondyqtan Kásipodaqtar federatsiiasy áleýmettik áriptestermen birge eńbek qaishylyqtaryn retteýdiń jáne qyzmetkerlerdiń zańdy múddesin qorǵaýdyń órkenietti tásilderin belsendi paidalanýy kerek.
Kásipodaqtardyń dánekerligi men mediatsiiasy arqyly eńbekkerler men jumys berýshilerdiń teń quqyly dialogynyń arqasynda ǵana eńbek qatynastaryn tiimdi retteýge bolady. Osyndai yntymaǵy jarasqan ortada eńbek etikasyn kemeline keltirip, áleýmettik jaýapkershilikti óristetýge bolady.
Osyǵan orai Ulttyq qoǵamdyq senim keńesi aiasynda eńbek zańnamasyna tolyqtyrýlar ázirlendi. Bul kásipodaq uiymdarynyń múmkindikterin keńeitip, olardyń áleýmettik institýttar júiesindegi rólin nyǵaita tústi.
Búgingi kásipodaq – Qazaqstandaǵy azamattyq qoǵamnyń basty belgisiniń biri!
Federatsiia osyndai ustanym men mártebesi arqyly myqty, belsendi ári isker kóshbasshylardy daralap shyǵarý kerek. Men kásipodaqtardyń kadrlyq quramyna jastardyń qosylǵanyn qalaimyn. Sol arqyly ashyq básekelestikke jaǵdai jasalyp, eńbekker jastarǵa tiimdi áleýmettik múmkindikter usynylady.
Qurmetti kásipodaq uiymdary músheleri!
Sizderdiń aldaryńyzda kóptegen mindetter tur. Solardy sheshý úshin árdaiym birlik, kásibi sheberlik jáne óz isińe degen adaldyq qajet.
Ortaq Otanymyz – Qazaqstan Respýblikasynyń igiligi jolyndaǵy eńbekterińizge tabys tileimin!
Qazaqstan Respýblikasynyń Prezidenti
Qasym-Jomart Toqaev
