Foto: Aqorda
Memleket basshysy Qasym-Jomart Toqaev Halyqaralyq azamattyq aviatsiia uiymy (ICAO) keńesiniń prezidenti Salvatore Shakkitanony qabyldady. Kezdesýde Qazaqstannyń azamattyq aviatsiia salasyndaǵy jetistikteri men halyqaralyq yntymaqtastyqty nyǵaitý máseleleri talqylandy, dep habarlaidy Ult.kz.
Prezident Qazaqstannyń Ortalyq Aziiada táýelsiz Aviatsiia ákimshiligin qurǵan alǵashqy memleket ekenin atap ótti. Bul qurylym ushý qaýipsizdigin baqylaýdy kúsheitip, saladaǵy ashyqtyq pen kásibilikti arttyrýǵa sep boldy. Sonymen qatar, Monreal qalasyndaǵy ICAO janyndaǵy Qazaqstannyń Turaqty ókildiginiń jumysy da nátijeli júzege asyp jatqany aityldy.
Kezdesý barysynda halyqaralyq baǵyttardyń keńeiýine erekshe nazar aýdaryldy. Búginde Qazaqstan álemniń 30-dan astam elimen tikelei áýe qatynasyn ornatqan. Aldaǵy ýaqytta Niý-Iork, Tokio jáne Singapýr qalalaryna reister ashý josparlanyp otyr.
Qasym-Jomart Toqaev byltyr Almaty, Shymkent jáne Qyzylorda qalalarynda jańa áýejai terminaldary iske qosylǵanyn atap ótti. Ásirese, Almaty halyqaralyq áýejaiynyń ótkizý qabileti jylyna 2,5 millionnan 14 million jolaýshyǵa deiin artqany – airyqsha jetistik.
Sondai-aq taraptar Qazaqstan men ICAO arasynda azamattyq aviatsiiany damytý jónindegi bas josparǵa qol qoiýdy mańyzdy qadam retinde baǵalady. Bul qujat aviatsiia salasynyń uzaqmerzimdi strategiiasyn aiqyndaýǵa múmkindik beredi.
Óz kezeginde Salvatore Shakkitano Qazaqstannyń aviatsiia salasyndaǵy júieli reformalary men ornyqty ósimine joǵary baǵa berdi. Ol elimizdiń halyqaralyq aviatsiia keńistigindegi bedeli artyp kele jatqanyn atap ótti.
Qasym-Jomart Toqaev aviatsiia salasyndaǵy halyqaralyq yntymaqtastyqty damytý men nyǵaitýǵa qosqan úlesi úshin Salvatore Shakkitanony I dárejeli «Dostyq» ordenimen marapattady.
