Úkimet irgeli ǵylym men zertteý institýttarynyń bazalyq qarjylandyrý kólemin arttyrý múmkindigin qarastyrýy qajet. Bul týraly Ulttyq qoǵamdyq senim keńesiniń 3-otyrysynda QR Prezidenti Qasym-Jomart Toqaev aitty, dep habarlaidy QazAqparat.
«Tolyqtai alǵanda, ǵylymdy qarjylandyrýdy kezeń-kezeńimen ulǵaitamyz jáne 2025 jylǵa qarai ony jalpy ishki ónimniń 1 paiyzyna jetkizemiz. Bul rette, biz eshkim oqymaityn qajetsiz jumystar men zertteýlerdi qarjylandyra almaimyz. Árbir ǵylymi jumystan suranys jáne naqty áleýmettik-ekonomikalyq ári óndiristik-tehnikalyq qaitarym bolýy tiis», - dedi Memleket basshysy.
QR Prezidentiniń atap ótýinshe, baǵdarlamalyq-maqsatty qarjylandyrý ulttyq ǵylymi-tehnikalyq mindetter negizinde ǵana bólinýi qajet.
«Kúsh-jigerdi jáne resýrstardy meditsinalyq-biologiialyq zertteý, agroónerkásiptik ǵylym, jasyl tehnologiia, jasandy intellekt, energiia únemdeý syndy salalarǵa baǵyttaǵan jón», - dep atap ótti Qasym-Jomart Toqaev.
Memleket basshysy birrettik granttyq konkýrstar nátijesine qaramastan úzdiksiz júzege asyrylýy tiisti irgeli zertteýler júrgizýmen ainalysatyn ǵylymi uiymdardy tikelei qoldaý mańyzdy ekendigin basa aitty.
«Úkimet irgeli ǵylym men zertteý institýttarynyń bazalyq qarjylandyrý kólemin arttyrý múmkindigin qarastyrýy qajet», - dedi Prezident.
