Prezident Qasym-Jomart Toqaev Úkimettiń keńeitilgen otyrysynda geologiialyq aqparattyń ashyqtyǵyna jaýaptylardyń áreketin sabotajǵa teńedi, dep habarlaidy QazAqparat.
«Jer qoinaýyn igerý jobasyn jasaqtaýǵa salynatyn investitsiialardy yntalandyrsaq degen josparymyz bar. Eldegi geologiia salasyndaǵy jumystardyń tiimdiligi men ashyqtyǵyn qamatamsyz etý – mańyzdy mindet. Biz bul jaiynda kóp aityp júrmiz, tipti jeke ministrlik te qurdyq. Alaida, ashyqtyqtyń bolmaýy, sheshimderdi kýlýarda qabyldaý búginge deiin salanyń damýyn tejep otyr. Al, geologiialyq aqparatqa joly ashyq adamdar baiyp jatyr», - dedi Memleket basshysy.
Prezidenttiń paiymynsha, resýrsqa bai telimderdiń tańdaýlylar men pysyqailarǵa «kilem astynan» úlestirilýine jol berýge bolmaidy.
«Úkimet birneshe jyldan beri mineraldyq resýrstardyń tsifrlandyrylǵan ashyq geologiialyq málimeti bar bankin qurýǵa ýáde berip keledi. Tiisti qarajat bólindi de. Biraq, osy bir mańyzdy tapsyrma áli kúnge deiin oryndalmai otyr jáne túrli syltaýlarmen sozbalańǵa salynyp ketti. Jumsaqtap aitsaq, másele kásibiliktiń tómendiginde. Qatty aitsaq, qasaqana sabotaj deýge bolady. Qaisysy bolsa da, saldary oryndaýshylar úshin ońai bolmaidy», - dedi Qasym-Jomart Toqaev.
