Memleket basshysy Eýraziialyq ekonomikalyq komissiia alqasynyń tóraǵasy Mihail Miasnikovichpen kezdesti, dep habarlaidy "Ult aqparat" Aqordaǵa silteme jasap.
Kezdesýde Eýraziialyq ekonomikalyq odaqtyń strategiialyq damý máseleleri jáne Qazaqstan Respýblikasynyń uiymǵa biylǵy tóraǵalyǵy kezindegi basym baǵyttary talqylandy.
Qasym-Jomart Toqaev Eýraziialyq ekonomikalyq odaq týraly sharttyń tolyqqandy júzege asyrylýynyń mańyzdylyǵyn atap ótti.
Áńgimelesý barysynda ózara saýdadaǵy kedergilerdi joiýǵa jáne Odaq sheńberinde óndiristik kooperatsiiany damytýǵa erekshe nazar aýdaryldy. Eýraziialyq ekonomikalyq odaqtyń tsifrlyq kún tártibin iske asyrýdyń, ónerkásipte, aýyl sharýashylyǵynda jáne kedendik retteýde tsifrlyq tehnologiialardy engizýdi jedeldetýdiń mańyzdylyǵy atap ótildi. Sondai-aq komissiia jumysynyń tiimdiligin arttyrý boiynsha usynystar qarastyryldy.
Taraptar Eýraziialyq ekonomikalyq odaqtyń úshinshi eldermen jáne halyqaralyq uiymdarmen (Eýrokomissiiamen, Dúniejúzilik saýda uiymymen, Ońtústik-Shyǵys Aziia memleketteri qaýymdastyǵymen jáne t.b.) saýda-ekonomikalyq qatynastardy jolǵa qoiý qajettigin atap ótti.
Óz kezeginde Mihail Miasnikovich Komissiianyń biylǵy jumystary men basymdyqtary jáne 2025 jylǵa deiingi strategiialyq damý josparyn júzege asyrý jaiynda aitty. Sonymen qatar ol Prezident Qasym-Jomart Toqaevtyń jýyrdaǵy úndeýinde aitylǵan Qazaqstan tóraǵalyǵynyń basym baǵyttaryn oryndaý jónindegi komissiianyń josparymen bólisti.
EEK alqasynyń tóraǵasy Qazaqstan Prezidenti aitqan naqty usynystar men bastamalardy qoldady. Mihail Miasnikovichtiń aitýynsha, Eýraziialyq ekonomikalyq odaqtyń jumysy biznes qoǵamdastyq arasyndaǵy yqpaldastyqty jandandyrýǵa, qosymsha qun qalyptastyryp, jańa jumys oryndaryn ashyp otyrǵan kásiporyndardy qoldaýǵa baǵyttalady. Budan bólek jas kásipkerlerdi demeýge de basymdyq beriledi.
Kezdesý qorytyndysy boiynsha 2021 jyldyń mamyr aiynda Qazaqstanda Joǵary keńestiń kezekti otyrysyn ótkizý jóninde sheshim qabyldandy. Atalǵan jiyn aiasynda Eýraziialyq iskerlik forýmyn ótkizý josparlanyp otyr.
