Foto: Akorda.kz
Memleket basshysy tennisshi Elena Rybakinany qabyldady, dep habarlaidy "Ult aqparat" Aqordanyń resmi saityna silteme jasap.
Prezident Qasym-Jomart Toqaev Australian Open, Indian-Ýells jáne Maiami týrnirlerinde keremet óner kórsetken Elena Rybakinany quttyqtap, sheberligi men jeńiske degen erik-jigeri úshin rizashylyǵyn bildirdi.
Memleket basshysy qazaqstandyq tennisshilerdiń jetistigi óskeleń urpaq arasynda osy sport túriniń tanymaldylyǵyn arttyrýǵa septigin tigizetinin atap ótti.
Óz kezeginde Elena Rybakina jeńis tuǵyrynan kóringen sátterinde qoldaý bildirgeni jáne júrekjardy quttyqtaýlaryn joldaǵany úshin Prezidentke alǵys aitty. Dańqty tennisshi aldaǵy ýaqytta da bedeldi halyqaralyq jarystarda sátti óner kórsetýge bar kúsh-jigerin jumsaitynyn jetkizdi.
Memleket basshysy Qasym-Jomart Toqaev qazirgi tańda elimizde 30 myńnan asa adam tennispen shuǵyldanatynyna toqtaldy. Onyń 10 myńnan astamy – 10 jasqa deiingi balalar. Osy sport túrine buqaralyq sipat berý maqsatynda elimizdiń 17 aimaǵynda tennis korttary salyndy. Sondai-aq Baby tennis, «10 jasqa deiingi tennis» sekildi jobalar tabysty júzege asyrylyp jatyr.
14-15 sáýir kúnderi Astanada alǵash ret Billi Djin King kýbogynyń irikteý matchy ótedi. Tennisten Qazaqstannyń áielder quramasy Polsha komandasyna qarsy oinaidy. Bul kezdesýdiń jeńimpazy álem chempionatyna joldama alady.
Memleket basshysy halyqaralyq deńgeidegi mundai is-sharalardy uiymdastyrý elimizdegi tennistiń damý deńgeiin arttyrýǵa tyń serpin beretinin aitty. Sondai-aq Parijde ótetin jazǵy Olimpiada oiyndaryna litsenziia utyp alǵan otandyq tennisshilerge sáttilik tiledi.
