Prezident Qasym-Jomart Toqaev BUU Bas hatshysynyń Órkenietter aliansy jónindegi Joǵary ókili Migel Anhel Moratinosty qabyldady, dep habarlaidy "Ult aqparat" Aqordaǵa silteme jasap.
Kezdesýde Álemdik jáne dástúrli dinder kóshbasshylarynyń VII seziniń kún tártibine jáne Qazaqstan men BUU Órkenietter aliansy arasyndaǵy yntymaqtastyqty odan ári damytýǵa qatysty máseleler talqylandy.
Memleket basshysy Migel Anhel Moratinosqa Qazaqstanǵa kelgenine jáne forýmdy ótkizýge dáiekti túrde qoldaý kórsetkenine alǵys aitty. Sondai-aq Alianstyń beibitshilik, tózimdilik mádenietin ilgeriletýge men adamdardy biriktirýge baǵyttalǵan kúsh-jigerin joǵary baǵalady.
BUU Bas hatshysynyń Joǵary ókili Álemdik jáne dástúrli dinder kóshbasshylarynyń VII seziniń joǵary deńgeide uiymdastyrylǵanyn atap ótip, jiyn nátijeleri beibitshilikti, kelisimdi jáne dinaralyq dialogty nyǵaitýǵa yqpal etetinine senim bildirdi.
