Memleket basshysy BUU Bas Assamleiasynyń Iadrolyq qarýdy tolyq joiý jolyndaǵy Halyqaralyq kúres kúnine arnalǵan joǵary deńgeidegi plenarlyq otyrysynda sóz sóiledi, dep habarlaidy "Ult aqparat" Aqordaǵa silteme jasap.
Qasym-Jomart Toqaev óz sózinde keibir elderde jasalyp jatqan iadrolyq baǵdarlamalardyń qarqyn alýyn únemi tónetin terrorlyq qaýip-qatermen bailanystyryp, aqyrzaman ornatatyn qarýlardyń qoldanylý qaýpi arta túskenin atap ótti. Qazaqstan Prezidenti degenmen bul baǵytta belgili bir deńgeide oń qadamdar jasalyp jatqanyna toqtaldy.
– Iadrolyq qarýǵa tyiym salý týraly shart kúshine endi, Iranmen aradaǵy iadrolyq qarýǵa qatysty mámileni qalypqa keltirý jónindegi kelissózder qaita qaralýda, shabýyldaýǵa arnalǵan qarýlardy azaitý jónindegi jańa shart uzartyldy, AQSh pen Resei arasynda strategiialyq turaqtylyq týraly birlesken málimdeme qabyldandy. Árine, ózara joiýǵa kepildik beretin doktrina iadrolyq derjavalardyń jýyq arada óz arsenalynan bas tartýy ekitalai ekenin bildiredi. Sondyqtan 2045 jylǵa deiin iadrolyq qarýdan azat, beibit ómir qalyptastyrýǵa umtylatynymyz týraly málimdei otyryp, kóńildegini naqty iske asyratynymyzǵa skeptikter kúmánmen qaraýy múmkin. Bizdiń tarihi tájiribemiz munyń basqasha bolatynyn kórsetedi, – dedi Memleket basshysy.
Qasym-Jomart Toqaev Qazaqstannyń Semei iadrolyq poligonyn jabý týraly sheshim qabyldap, iadrolyq qýaty jaǵynan tórtinshi sanalatyn arsenalynan bas tartqanyna biyl 30 jyl tolǵanyn eske salyp ótti.
– On bes jyldan keiin Ortalyq Aziia memleketteri óz óńirlerin iadrolyq qarýdan azat aimaq dep jariialady. Bul – tolyqtai Soltústik jarty sharda ornalasqan alǵashqy iadrosyz óńir. Iadrolyq qarý saiasi tańdaý bolǵandyqtan jaǵdai men strategiialyq ádister tez ózgerýi múmkin. Qazaqstannyń Iadrolyq synaqtarǵa jan-jaqty tyiym salý týraly sharttyń tezirek kúshine enýine qol jetkizýge bel bailaǵanyn taǵy da naqtylaimyn. Qazaqstan adamzattyń damýy jolynda iadrolyq qarýdan bas tartý jónindegi basymdyǵyn odan ári paidalana beretinin bul baǵyttaǵy oń qadam retinde atap ótkim keledi, – dedi Prezident.
Memleket basshysy Iadrolyq qarýdy taratpaý jónindegi shart iadrolyq energiiany azamattyq maqsatqa zańdy túrdi paidalaný men iadrolyq qarýdy taratýdyń ara-jigin ajyratatynyn aitty. Prezidenttiń aitýynsha, iadrolyq qýat birte-birte tómen kómirtekti energiianyń mańyzdy kózine ainalýda. Qazaqstanda óz atom ónerkásibin damytý úshin keshendi tehnikalyq-ekonomikalyq negizdeme jasalyp jatyr.
– Iadrolyq qarýdan azat, beibit ómir qalyptastyrý meniń úkimetimniń saiasatyndaǵy basymdyq bolyp qala beredi. Bul umtylys sońǵy otyz jyl ishinde Qazaqstandy iadrolyq qarýǵa qarsy jahandyq qozǵalystyń jaqtaýshysy etti. Sonymen qatar bizdiń ulttyq tutastyǵymyzdyń bir bóligine ainaldy. Biz qarýsyzdaný jáne iadrolyq qarýdy taratpaý jolyndaǵy kúsh-jigerimizdi aldaǵy ýaqytta sizdermen birlese jumsaýǵa daiynbyz, – dep málimdedi Qasym-Jomart Toqaev.
