Sýret: ashyq derekkóz
Búgin Qazaqstan Prezidenti Qasym-Jomart Toqaev týrizmdi damytý máseleleri boiynsha keńes ótkizdi, dep habarlaidy "Ult aqparat". Memleket basshysy Shýche-Býrabai kýrorttyq aimaǵynyń biregei bailyq ekenin atap ótti.
"Býrabai Astanadan alys emes. Sondyqtan elorda turǵyndary men qonaqtary bul jerge jii barady. Týrister sany jyldan jylǵa artyp keledi. Degenmen, onda infraqurylym salý jumysy óte baiaý júrip jatyr. Sonyń saldarynan jergilikti demalys oryndaryndaǵy ekologiialyq ahýal áli de kúrdeli. Jergilikti bilik mańyzdy infraqurylymdyq jobalardyń oryndalýyn sozbalańǵa salyp otyr. Mysaly, Shýche-Býrabai kýrorttyq aimaǵyn damytý jospary tolyq júzege asqan joq. Bul qujat sonaý 2012 jyly qabyldanǵan. Jospar boiynsha 126 milliard teńge bólinýge tiis edi. Is júzinde 35 milliard teńge berilgen. Bul kózdelgen qarjynyń nebári 28 paiyzy. On jyldan astam ýaqyt ótti. Biraq demalys ornynda tazartý qondyrǵylary ornatylǵan joq. Sý jelileri men jylý kózderiniń qurylysy da tolyq bitpegen. Úkimet, Prezident Is basqarmasy jáne oblys ákimdigi osy jobalardy kópke sozbai, qysqa merzimde aiaqtaýǵa tiis", - dedi Memleket basshysy.
Úkimet pen jergilikti ákimdikke Býrabai kýrorttyq aimaǵynda ornalasqan "Aqbýra", Jókei kóli, Qatarkól, Tekekól jáne basqa da jańa týristik aimaqtardy damytý tapsyryldy. Sonymen qatar, Býrabai aimaǵyna Astana, Qaraǵandy, Pavlodar, Óskemen qalalarynan jedel qatynaityn poiyzdardy iske qosý mindeti júkteldi. Prezident Is basqarmasy ázirlep jatqan "Burabay Travel" biryńǵai tsifrlyq platformasynda mańaidaǵy týristik aimaqtardy túgel qamtý qajet ekeni aityldy.
Memleket basshysy Qazaqstan týrizmin nasihattaý úshin zamanaýi quraldardy belsendi qoldaný qajettigin atap ótti.
