Foto: Akorda.kz
Prezident Qasym-Jomart Toqaev bokstan Ózbekstannyń Tashkent qalasynda ótken álem chempionatynyń jeńimpazdary – Sanjar Táshkenbai, Mahmud Sabyrhan, Aslanbek Shymbergenov, Nurbek Oralbai jáne kúmis medal iegeri Dýlat Bekbaýovty, sondai-aq bokstan Qazaqstan ulttyq quramasynyń músheleri men bapkerlerin qabyldady, dep habarlaidy "Ult aqparat" Aqordanyń resmi saityna silteme jasap.
Memleket basshysy sportshylardy álem chempionatyndaǵy jarqyn jeńisimen shyn júrekten quttyqtap, bul kúlli elimiz úshin aitýly oqiǵa ekenin atap ótti.
– Álemdik jarysta tórt altyn, bir kúmis medal alý – zor jetistik. Qazaq jigitteri álem chempiony atanyp, elimizdiń mereiin ósirdi. Osy múmkindikti paidalana otyryp, barlyq jankúierlerge alǵysymdy bildiremin. Olardyń daýysy sonaý Tashkent tórinen anyq estildi. Dál osyndai shynaiy qoldaý sportshylarymyzǵa airyqsha kúsh bergeni sózsiz. Sport dodasyn búkil halqymyz kórdi, sizderge tilekshi boldy dep aitsaq, artyq bolmaidy. Men de finaldaǵy jekpe-jekterdi túgel kórdim. Jigitterimiz el namysyn qorǵaý úshin bar kúshin salyp aiqasty. Jelbiregen kók týymyzben jáne ánuranymyzben birge halqymyzdyń rýhy kóterildi. Ulttyń asqaq rýhy jáne otanshyldyq qasieti degenimiz – osy! Óitkeni sportshylarymyzdyń árbir jeńisi eldi qanattandyrady. Shyn máninde, ótken jeksenbi qazaq boksynyń asyǵy alshysynan túsken kún boldy. Muhittyń ar jaǵynda Jánibek Álimhanuly chempiondyq ataǵyn abyroimen qorǵady. Onyń jeńisti joly Tashkentte jalǵasty. Osynyń bári barsha qazaqtyń mereiin tasytty, – dedi Prezident.
Memleket basshysy qazaq sportynyń jańa beleske kóterilip kele jatqanyna nazar aýdardy.
– Shahmatshy Bibisara Asaýbaeva blitsten álem chempiony atandy. Tennisshi Elena Rybakina bedeldi týrnirlerde qatarynan birneshe ret top jardy. Balýandarymyz, onyń ishinde qyzdarymyz da bar, Aziia chempionatynda 7 altyn medal aldy. Nurǵisa Ádiletuly aýyr atletikadan Aziia chempiony boldy. Fýtbolshylarymyz, hokkeishilerimiz jaqsy nátije kórsetip júr. Árine, sportta jeńis te, jeńilis te bolady. Degenmen bizdiń sportshylarymyz biik belesterdi baǵyndyryp keledi. Buǵan bapkerler men basqa da sport mamandarynyń zor eńbek sińirgeni anyq. Barshańyzǵa shynaiy rizashylyǵymdy bildiremin, – dedi Qasym-Jomart Toqaev.
Prezident elimizde sport salasyn damytýǵa airyqsha mán beriletinin, jastardyń jappai sportpen ainalysýyna qajetti jaǵdai jasalatynyn aitty.
Memleket basshysy sózin qorytyndylai kele, sportshylarǵa sáttilik tilep, aldaǵy bairaqty básekelerde el namysyn laiyqty qorǵaitynyna senim bildirdi. Sondai-aq Qazaqstan boks federatsiiasynyń basshylyǵyna, sportshylar men bapkerlerge Qazaqstan Respýblikasy Prezidentiniń Alǵys hattary men Qurmet gramotalaryn tabys etti.
