Búgin Memleket basshysy Qasym-Jomart Toqaev «Egemen Qazaqstan» gazetinde jariialanǵan «Kúre joldaǵy kúrsinis» atty maqalaǵa nazar aýdardy, dep habarlaidy "Ult aqparat" BORT N1 Telegram anasyna silteme jasap.
Basylym Batys Qazaqstan oblysyndaǵy kúre joldar jaǵdaiynyń nasharlyǵyna bailanysty másele kótergen. Prezident bul óńirdiń kólik-logistikalyq áleýetin jańǵyrtý mańyzdy mindettiń biri ekenin jáne avtojoldardyń 70 paiyzynyń sapasy syn kótermeitinin 2019 jyly aitqan bolatyn. Memleket basshysy Oralda ótken kezdesýde «bul azamattardyń kúndelikti ómirinde qiyndyq týǵyzyp qana qoimaidy, sondai-aq óńirdiń eksporttyq jáne tranzittik áleýetin tómendetedi» degen edi.
Prezident sol kezde Úkimetke ákimdikpen birlesip, Qaztalov, Jánibek jáne Bókei ordasy aýdandaryndaǵy joldardy jóndeý jumystaryn 2021 jyldyń sońyna deiin aiaqtaýǵa tapsyrma berdi jáne bul másele óziniń jeke baqylaýynda bolatynyn erekshe atap ótti.
"Alaida «Egemen Qazaqstan» gazetindegi málimetter boiynsha osy aýdandardy oblys ortalyǵymen bailanystyratyn joldarǵa áli kúnge deiin asfalt tóselmegen. Qurylys jumystary bekitilgen kesteden aitarlyqtai qalyp keledi jáne qarjy máselesinde de túitkilder bar. Jergilikti turǵyndar joldyń joqtyǵynan zardap shegip otyr, ásirese kóktem men kúzde jaǵdai múlde ýshyǵa túsedi.
Memleket basshysy Úkimet pen oblys ákimdigine barlyq qajetti sharany tez arada qabyldaýdy tapsyrdy. Tiisti jumystardyń belgilengen merzimde oryndalmaýyna kináliler jazalanýǵa tiis. Prezident bul máseleni sheshýdi Premer-Ministr Álihan Smaiylovqa júktedi" delingen habarlamada.
