Qasym-Jomart Toqaev Naýryz merekesine orai memlekettik nagradalar tapsyrý rásimine qatysty, dep habarlaidy "Ult aqparat" Aqordanyń resmi saityna silteme jasap.
Memleket basshysy óz sózinde saltanatty jiynǵa qatysýshylardy Ulystyń uly kúnimen quttyqtap, bul meiramnyń tarihy tereń tól merekemiz ekenin atap ótti.
– Áz Naýryz tabiǵatty túletip, tirshilikke nár beredi, jańarý men jańǵyrýǵa úndeidi. Men kúni keshe ǵana halyqqa Joldaýymdy jariialap, Jańa Qazaqstandy qurýǵa jol ashatyn mańyzdy bastamalar usyndym. Munyń bári – elimizde júzege asyrylyp jatqan saiasi reformalardyń zańdy jalǵasy. Bizdiń maqsatymyz – tiimdi memleket jáne ádil qoǵam qurý. Sondai-aq halqymyzdyń ál-aýqatyn arttyryp, turmys sapasyn jaqsartý. Eń bastysy, qasterli Táýelsizdigimizdi qorǵap, Qazaqstandy myqty memleketke ainaldyrý, – dedi Prezident.
Memleket basshysy qoǵamnyń barlyq salasynda túbegeili ózgeris jasaýǵa kirise otyryp, elimizdi damytýdyń múlde jańa kezeńine qadam basatynymyzǵa nazar aýdardy. Onyń pikirinshe, Jańa Qazaqstan – abstrakty ideia emes, keleshektiń jarqyn kórinisi.
– Sizderdiń árqaisylaryńyz yntymaq pen birlik qundylyqtaryna adaldyǵyn is júzinde dáleldegen naǵyz patriotsyzdar. Ózderińizdiń qajyrly eńbekterińizben, kómek qolyn sozýǵa degen shynaiy nietterińizben barsha otandasymyzǵa úlgi-ónege kórsetesizder. Biz Qazaqstandy reformalaý úderisin bastadyq. Jańa múmkindikter men damýǵa umtylǵan Jańa Qazaqstandy birge quramyz, – dedi Qasym-Jomart Toqaev.
Prezident Joldaýdaǵy árbir bastamany osy maqsatqa jetý jolyndaǵy naqty qadam dep sanaidy. Ony tabysty júzege asyrý – barshamyzdyń ortaq mindetimiz.
– Qazir aýmaly-tókpeli kezeń bolyp tur. Geosaiasi ahýal kúnnen kúnge ýshyǵa túsýde. Onyń salqyny belgili sebepterge bailanysty Qazaqstanǵa da tiedi. Biraq, biz baǵdarymyzdan ainymai, kózdegen maqsatymyzǵa qalaida jetemiz. Sol úshin bir jaǵadan bas, bir jeńnen qol shyǵaryp, jumyla jumys isteýimiz kerek, – dedi Memleket basshysy.
Qasym-Jomart Toqaevtyń aitýynsha, búginde árbir otandasymyz egemen elimizdi órkendetýge óz úlesin qosýda. Halqymyz qashanda bereke-birlikke, yrys-yntymaqqa basa mán bergen, ózara janashyrlyq pen qamqorlyqty barynsha dáriptegen.
– El ishinde beibit kúnde eńbegimen, qiyn sátte erligimen kózge túsken jandar az emes. Keshegi dúrbeleń kezinde qanshama azamatymyz jurtty sabyrǵa shaqyryp, saliqaly sóz aitty. Olar óz basyn qaterge tigip, ainalasyndaǵy adamdarǵa kómektesti. Jaýapty sátte jurtyna qorǵan bolyp, eldiktiń naǵyz úlgisin kórsetti. Osyndai otanshyl tulǵalarymyz – jas urpaqqa ónege. Halqymyz «Er – eńbegimen qadirli» dep beker aitpaǵan. Elge eńbegi sińgen jandarǵa Ulystyń uly kúninde qurmet kórsetýdiń zor simvoldyq máni bar, – dedi Prezident.
Qasym-Jomart Toqaev sózin qorytyndylai kele, Naýryz merekesi qarsańynda bir top qairatkerge memlekettik nagrada tapsyrý jóninde sheshim qabyldaǵanyn jetkizdi. Sondai-aq bul is-sharany osy meiramǵa orai ótkizý igi dástúrge ainalatynyn aitty.
