Foto: Aqorda
«Aqorda» rezidentsiiasynda jeti memlekettiń tótenshe jáne ókiletti elshileriniń Qazaqstan Respýblikasynyń Prezidenti Qasym-Jomart Toqaevqa senim gramotalaryn tapsyrý rásimi ótti, dep habarlaidy "Ult aqparat" Aqordaǵa silteme jasap.
Senim gramotalaryn Ispaniia Koroldiginiń elshisi Lýis Fransisko Martines Montes, Estoniia Respýblikasynyń elshisi Iaap Ora, Ózbekstan Respýblikasynyń elshisi Bahtiior Ibragimov, Sýdan Respýblikasynyń elshisi Muhammed ál-Gazali Sirradj, Rýanda Respýblikasynyń elshisi Charlz Kaionga, Dominikan Respýblikasynyń elshisi Alehandro Arias Sarsýela jáne Mavrikii Respýblikasynyń elshisi Hesvar Djanke tapsyrdy.
Memleket basshysy diplomattar aldynda sóz sóiledi.
"Qazaqstan syrtqy saiasatynda beibitshilikti jaqtaidy, BUU Jarǵysynyń qaǵidattaryn berik ustanady jáne halyqaralyq yntymaqtastyqqa árdaiym ashyq. Biz Birikken Ulttar Uiymynyń jahandyq keńistiktegi ornyn eshqandai qurylym almastyra almaitynyna nyq senimdimiz. Bul biregei uiymdy árqashan qoldaimyz. Osy oraida sizderdiń elderińizben ekijaqty qarym-qatynasty, sondai-aq kópjaqty deńgeidegi bailanystardy damytýǵa niettimiz. Qazaqstan – qarqyndy damyp kele jatqan memleket. Biz ekonomikamyzdyń turaqtylyǵyn qamtamasyz etýge umtylyp otyrmyz. Árine, bul ońai emes. Onyń tabysty bolýy kóp jaǵdaida halyqaralyq yqpaldastyqqa, sonyń ishinde sizderdiń elderińizben aradaǵy yntymaqtastyqty damytýǵa bailanysty", – dedi Prezident.
Qasym-Jomart Toqaev elshilerdi Qazaqstandaǵy diplomatiialyq missiialarynyń resmi bastalýymen quttyqtap, olardyń memleketteriniń basshylaryna izgi tilegi men sálemin joldady.
