Foto: Akorda.kz
Prezident "Báiterek" ulttyq basqarýshy holdingi" AQ basqarma tóraǵasy Qanat Sharlapaevty qabyldady, - dep habarlaidy "Ult aqparat" Aqorda saityna silteme jasap.
Memleket basshysyna holdingtiń byltyr atqarǵan jumystarynyń qorytyndysy týraly esep berilip, aldaǵy kezeńge arnalǵan jospary tanystyryldy. Prezidentke kásipkerlikti, agroónerkásip keshenin qoldaý jáne halyqty turǵyn úimen qamtamasyz etý jóninde usynystar berildi.
Memleket basshysyna holdingtiń 2022 jyly 350 milliard teńge taza rekordtyq paida tapqany týraly baiandaldy. Bul 2020 jylǵy kórsetkishten bes ese jáne 2021 jylǵy nátijeden úsh ese kóp.
Ótken jyldyń qorytyndysy boiynsha quny 685 milliard teńge bolatyn 238 iri joba men lizingtik mámileler qarjylandyryldy. Shaǵyn jáne orta biznesti qoldaý aiasynda somasy shamamen 1,5 trillion teńgeni quraityn 50,5 myń jobaǵa sýbsidiia berildi.
Basqarma tóraǵasynyń málimetine sáikes agroónerkásip kesheni sýbektilerine josparlanǵan 432 milliard teńgeniń ornyna 522 milliard teńge kóleminde qarjy bólingen.
Sonymen qatar Qanat Sharlapaev halyqty turǵyn úimen qamtamasyz etý aiasynda jalpy quny shamamen 1,4 trillion teńge jeńildetilgen ipotekalyq qaryz berilgeni, quny 211,8 milliard teńgeni quraityn úlestik qurylysqa kepildik jasalǵany, kredittik turǵyn úi qurylysyn qarjylandyrý úshin ákimdikterge 176,4 milliard teńge bólingeni týraly baiandady. Osylaisha, qoldaý sharalarynyń nátijesinde 2,2 million sharshy metrden astam turǵyn úi paidalanýǵa berildi, ipotekalyq kredit berý esebinen 79 865 otbasy turmystyq jaǵdaiyn jaqsartty.
Memleket basshysy biznesti odan ári qoldaýdyń mańyzdylyǵyna basa nazar aýdardy. Sondai-aq elimizdiń eksporttyq áleýetin arttyrýǵa jáne agroónerkásip keshenin damytýǵa "Báiterek" holdinginiń belsendi atsalysýy qajet ekenin aitty.
