Resei men Ýkraina arasyndaǵy daǵdarys Memleket basshysy Nursultan Nazarbaevty erekshe qynjyltady. Ol baýyrlas eki eldi parasatty dialogqa shaqyrdy. Bul týraly Prezident Qazaqstanda tirkelgen diplomatiialyq missiialar men halyqaralyq uiymdardyń basshylarymen kezdesýde aitty, dep habarlaidy Sputnik Qazaqstan tilshisi.
"Halyqaralyq terrorizmniń geografiiasy men aýmaǵy keńeiip keledi, jappai qyryp-joiý qarýynyń taralý jáne ony jetkizý qaýpi artyp otyr. Osyǵan orai ýaqyt bizden birlik, saiasi erik pen tabandy is-áreketti talap etedi. Birinshiden, eń úlken qaýip iadrolyq qarýy bar derjavalar arasyndaǵy bolýy yqtimal qaqtyǵys bolyp otyr. Bul rette jahandyq turaqtylyq pen qaýipsizdikti qamtamasyz etýde Batys pen Resei arasyndaǵy syndarly dialog úlken mańyzǵa ie. Ózara sanktsiialar tek Eýropa men Reseige ǵana emes, basqa da óńirlerge de zardabyn tigizýde. Ol álemdik ekonomikanyń qalpyna kelip, damýyna yqpal etip jatqan joq", — dedi Elbasy kezdesýde.
Memleket basshysynyń aitýynsha, Ýkrainanyń ońtústik-shyǵysyndaǵy oqiǵalar árqashan jaqyn baýyrlas el bolǵan memleketter arasyndaǵy teketires pen jariia aitys, pikirtalasqa alyp keldi.
"Bul ókinishti jaǵdai osy halyqtar men olardyń dostaryn, shynyn aitqanda, ásirese meni qynjyltady. Biz eki tarapty da parasatty dialogqa kóshýge shaqyramyz. Basqa jol joq. Kez kelgen qaqtyǵys, tipti dúniejúzilik soǵystar da kelissózder barysynda aiaqtalady. Men osyǵan shaqyramyn", — dedi Nazarbaev.
Prezident Qazaqstannyń kelissózder ótkizýge kómektesýge daiyn ekenin jetkizdi.
"Men óz basym úlken jiyrmalyqtyń kezdesýinde Resei men AQSh prezidentteriniń kezdesýine úlken úmit artamyn. Ýkrain-resei daǵdarysyn sheshýden Batys pen Resei, sonymen birge barlyq úlken derjavalar arasyndaǵy qarym-qatynastyń jaqsarýy bastalatynyn bilemiz. Kelisim bolmasa, jahandyq ekonomika, saiasat máseleleri jáne terrorizm men ekstremizm sekildi syn-qaterlerdi jeńý múmkin emes. Álemde ózekti oiynshylar arasyndaǵy senim daǵdarysynan úrei men qaljyraý kúsheie túsýde", — dedi Elbasy.
"Uly derjava degenimiz álemdegi beibitshilikke úles qosatyn derjava dep esepteimin. Eshqandai basqa ister, bailyq munyń ornyn toltyra almaidy. Jahandyq qaqtyǵys bola qalsa, jeńimpaz bolmaityny bárimizge belgili. Sondyqtan oǵan jol bermeý asa mańyzdy", — dep túidi sózin Qazaqstan prezidenti.
