Foto: Aqorda
Memleket basshysy Qasym-Jomart Toqaev Bas prokýror Berik Asylovty qabyldap, eldegi zań ústemdigi men prokýratýra qyzmetiniń negizgi baǵyttary boiynsha esep tyńdady, dep habarlaidy Ult.kz.
Berik Asylovtyń aitýynsha, arnaiy prokýrorlar biyl sotqa 55 qylmystyq is joldaǵan, nátijesinde 112 adam sottalǵan. Qazirgi tańda 80 is sot qaraýynda tur. Tekserilgen ister boiynsha memleketke kelgen 14,4 mlrd teńge zalal óteldi.
Sonymen qatar, prokýrorlar qylmystyq jolmen tabylǵan múlikti anyqtaý jáne ony el ekonomikasyna qaitarý jumystary týraly baiandady. Jalpy quny 105 mlrd teńgeniń aktivine tyiym salynǵan, onyń ishinde esirtkige qarsy ister boiynsha 12 mlrd teńge aktiv memleketke ótkizilgen.
Sońǵy eki jylda prokýratýra organdary 850 mlrd teńge kólemindegi aktivti qaitardy. Bul qarajatqa óńirlerde 400-ge jýyq áleýmettik jáne kommýnaldyq nysan salynýda, olardyń 60-ynyń qurylysy aiaqtaldy.
Bas prokýratýranyń ataýy ózgerip, jańa formatta kásipkerler men investorlardyń quqyǵyn qorǵaýǵa basymdyq berilmek.
Prezident barlyq salada zańdylyqty qamtamasyz etip, «Zań men tártip» qaǵidatyn nyǵaitý qajettigin atap ótti. Sondai-aq quqyq qorǵaý jáne memlekettik organdardyń alaiaqtyqpen, esirtki saýdasymen, turmystyq zorlyq-zombylyqpen, vandalizmmen kúresti kúsheitip, biznesti negizsiz qylmystyq qýdalaýǵa jol bermeý sharalaryn úilestirý mańyzdy ekenin aitty.
