Sýret ashyq derekkózden alyndy
Memleket basshysy Qasym-Jomart Toqaev qazaqstandyqtardy Táýelsizdik kúnimen quttyqtady, - dep habarlaidy "Ult aqparat" Aqordanyń baspasóz qyzmetine silteme jasap.
"Qurmetti otandastar!
1991 jylǵy 16 jeltoqsan - tól tarihymyzdaǵy mereili beles. Bul - egemen el bolýdy ańsaǵan ata-baba armany aqiqatqa ainalǵan uly kún.
Táýelsizdik kúniniń airyqsha mán-maǵynasy bar. Azattyq úshin arpalysqan ult perzentterin el jadynda máńgi saqtaý - qasietti paryzymyz. Olardyń otanshyldyq qasieti - búgingi jáne bolashaq urpaqqa árdaiym úlgi-ónege.
Biz tamyry tereń memlekettigimizdiń mańyzdy belesterin ulyqtap, ultty uiystyratyn ortaq qundylyqtardy nyǵaita beremiz. Sol arqyly qasterli Táýelsizdigimizdiń tuǵyryn biiktete túsemiz.
Táýelsizdik - baǵa jetpes bailyq. Bárimiz ony kózdiń qarashyǵyndai saqtaýymyz kerek. Memleketimizdiń egemendigin, elimizdiń amandyǵy men jerimizdiń tutastyǵyn qorǵaý - ár azamattyń qasterli boryshy.
Biyl elimiz úshin betburysty jyl boldy. Buryn-sońdy bolmaǵan syn-qaterlermen betpe-bet keldik. Eldigimizge ishten de, syrttan da zor qaýip tóndi. Degenmen myzǵymas birlik pen yrys-yntymaqtyń arqasynda barlyq qiyndyqty eńserip kelemiz.
Biz aýqymdy saiasi jáne ekonomikalyq reformalardy qolǵa alyp, memleketimizdi jańǵyrtýdyń jańa kezeńine qadam bastyq. Bul bastamalardy tabysty júzege asyrý - árqaisymyzdyń qolymyzda.
Egemen elimizdi odan ári damytý - aldymyzda turǵan basty mindet. Biz osy jolda aianbai eńbek etýimiz qajet. Sonda ǵana Qazaqstan qýatty memleketke ainalady.
Barshańyzdy búgingi ulyq merekemen shyn júrekten quttyqtaimyn!
Sizderge zor densaýlyq, baq-bereke tileimin! Qazaqstanymyz órkendei bersin! Qasietti Táýelsizdigimiz máńgi bolsyn!" - dedi Prezident.
