Qasym-Jomart Toqaevtyń atyna Qazaqstan Respýblikasynyń Táýelsizdik kúnine orai shet memleketterdiń basshylary men halyqaralyq uiymdardyń jetekshileri atynan quttyqtaý jedelhattary tolassyz kelip túsýde, dep habarlaidy Aqordanyń baspasóz qyzmeti.
BUU Bas hatshysy Antoniý Gýterrish Qazaqstan halqyn ulttyq merekesimen quttyqtady.
«Biz búginde halyqaralyq yntymaqtastyq burynǵydan da asa qajet qiyn zamanda ómir súrip jatyrmyz. «Biz, BUU halqy» beibitshilik, turaqty damý jáne adam quqyǵy aiasynda izgi nietpen birige alsaq, budan búkil álem utady», – delingen quttyqtaý jedelhatynda.
Saýd Arabiiasynyń Koroli Salman ben Abdel Aziz Ál Saýd Qasym-Jomart Toqaevtyń atyna joldaǵan quttyqtaýynda: «Dostas Qazaqstan halqynyń ósip-órkendei berýin, Sizge zor densaýlyq jáne baqyt tileimin»,– dep jazǵan.
Frantsiia Prezidenti Emmaniýel Makron frantsýz halqynyń atynan Qazaqstanǵa baq-bereke tilegen.
«Elderimiz arasyndaǵy qarym-qatynastyń joǵary dárejede ekenin erekshe atap ótkim keledi. 2018 jyldyń 18 qazanynda Tuńǵysh Prezident Nursultan Nazarbaevpen Briýsselde ótken Eýropa-Aziia sammitiniń aiasynda kezdeskenimizde ekonomikanyń úsh basym baǵyty boiynsha, atap aitqanda, aýyl sharýashylyǵy jáne taǵam óndirisi, tsifrly damý, energiia kózderin jańartý salalarynda yntymaqtasa jumys isteýge ýaǵdalasqanymyzdy bilesiz. Endi osy salalardaǵy bastamalarymyzdy birge iske asyrýymyz kerek. Ol úshin aldaǵy on jylǵa baǵyttalǵan strategiialyq áriptestiktiń jol kartasyn birlesip anyqtasaq jón bolar edi. Bul bizdiń birlesken jańa jobalarymyzdyń iske asýyna kóp septigin tigizedi», – dep jazady Frantsiia Prezidenti.
Emmaniýel Makron Qazaqstannyń ujymdyq qaýipsizdik jáne atom energiiasyn beibit maqsatta paidalaný sekildi bastamalaryn qoldaitynyn aitqan.
Belarýs Prezidenti Aleksandr Lýkashenko Qazaqstan táýelsizdik jyldarynda áleýmettik-ekonomikalyq damý, turaqtylyq pen ulttyq kelisimdi qamtamasyz etý boiynsha zor jetistikterge jetkenin atap ótti.
«Jahandyq qaýipsizdikke, Eýraziia keńistigindegi integratsiialyq úderisterdi tereńdetýge, órkenietti qoǵam qurýǵa mańyzdy úles qosyp otyrǵan Qazaqstan halyqaralyq bailanystarda abyroily memleket retinde bedelin nyǵaitty. Ózara senimge, qoldaýǵa jáne tyǵyz seriktestikke negizdelgen dástúrli Belarýs-Qazaqstan dostyq qatynastary aldaǵy ýaqytta da eki eldiń igiligi úshin arta beredi dep senemin», – delingen jedelhatta.
Sondai-aq Táýelsizdik kúnine orai Grýziia Prezidenti Salome Zýrabishviliden, Moldova Prezidenti Igor Dodonnan, Egipet Arab Respýblikasynyń Prezidenti Abdel Fattah As-Sisiden, Armeniia Premer-Ministri Nikol Pashiniannan, Saýd Arabiia Koroldiginiń Taq murageri, Ministrler keńesi tóraǵasynyń orynbasary, Qorǵanys ministri Mýhammad ben Salman Abdel Aziz Ál Saýdtan, Tatarstan Prezidenti Rýstam Minnihanovtan quttyqtaý hattar keldi.
.jpeg)