Búgin Elbasy Nursultan Nazarbaev «EKSPO-2017» kórmesiniń daiyndyq barysyna jáne Astana qalasyn damytýǵa arnalǵan keńeste elorda ákimi Áset Isekeshevke qala ortalyǵyndaǵy eski úilerdiń máselesin sheshýdi tapsyrdy, dep habarlaidy QazAqparat.
Keńes barysynda Memleket basshysy elorda aýmaǵyndaǵy birqatar kóshelerdiń boiynda qalanyń kórkin buzyp turǵan nysandar men jeke turǵyn úilerdiń sýretin kórsetti.
«Eski úilerdi súrip tastaý boiynsha jumystardy jandandyrý qajet. Dál osy jerlerge týrister baryp, sýretke túsirip, barsha álemge kórsetedi», - dep eskertti Prezident.
Osy oraida Memleket basshysy kósheniń bet kelbetin ásemdegenimen, nysandardyń artqy jaqtarynda kemshilikter bar ekenin qadap aitty.
«Jumystardy tyńǵylyqty atqaryńyzdar. Qajet bolsa, arnaiy qarjyny bólý kerek. EKSPO aiasynda barlyǵyn tártipke keltirý múmkindigi bar. Osy jerlerde turǵyn úiler salynatyn bolsa, qurylysshylarǵa arzanǵa túsedi. Sebebi ortalyqta kommýnikatsiialar, jylý júiesi tartylǵan. Atap aitqanda, qalanyń ortalyq aýdandaryn eski úilerden bosatý kerek», - dedi N. Nazarbaev.
Bul turǵyda Prezident eger de Parlamentte arnaiy zańnamany qabyldaý qajet bolsa, qujatty tezdetip engizýdi tapsyrdy.
«Óitkeni bul máseleler elordanyń, jalpy eldiń múddesin qamtidy. Eshkim de alyp-satarlyqpen ainalysyp, bul eski úiler esebinen tabysqa kenelemin dep oilamaýy tiis», - dep túiindedi sózin Elbasy.
