Foto: Akorda.kz
Memleket basshysy Syr óńirine jumys sapary aiasynda osy ólkeniń brendine ainalǵan kúrish óndirisimen tanysý úshin «Altyn orda» zaýytyna bardy, dep habarlaidy "Ult aqparat" Aqordanyń baspasóz qyzmetine silteme jasap.
Kásiporyn direktory Saǵidýlla Syzdyqovtyń aitýynsha, zaýyt jylyna 30 myń tonna aqtalǵan kúrish óndiredi. Ónimniń basym bóligi ishki naryqqa, sonymen qatar kórshiles elderge ótkiziledi.
Prezidentke Qyzylorda oblysyndaǵy aýyl sharýashylyǵy taýaryn óndirýshilerdiń ónimderi tanystyryldy. Kórmege kúrish ósirýmen ainalysatyn iri kásiporyndardyń taýar túrleri, sondai-aq et, sút, konditer jáne balyq ónimderi, kókónister men jemister qoiylǵan.
Memleket basshysy Syr boiy diqandary men sharýalarynyń eńbegine tabys tiledi. Sondai-aq tek kúrish ósirýmen shektelmei, agroónerkásip salasyn ártaraptandyrý, ásirese, sýdy az qajet etetin daqyldardy ósirý mańyzdy ekenine nazar aýdardy.
Degenmen Prezident eksporttyq áleýeti joǵary dástúrli kúrish sharýashylyǵyn odan ári jetildirýge de basa mán berý qajettigin atap ótti.
Bul rette Ybyrai Jaqaev atyndaǵy Qazaq kúrish sharýashylyǵy ǵylymi-zertteý institýty ýkrainalyq mamandarymen birlesip, kúrishtiń basqa da sorttaryn jersindirý jumystaryn júrgizip jatyr.
Sonymen qatar Qasym-Jomart Toqaev osy óndiristik keshen aýmaǵynda byltyr iske qosylǵan «Assol» tuz óndirý zaýytyn da aralap kórdi. Araldyń tuzyn kádege jaratyp, as tuzyn shyǵaratyn kásiporynda 130 adam jumyspen qamtylǵan. Ónim kórshiles Reseimen qatar, Latviia, Litva, Estoniia, Belarýs memleketterine eksporttalady.
