Memleket basshysy Qasym-Jomart Toqaev áleýmettik kásipkerlikti qoldaýǵa ýáde berip otyr. Prezidentpen kezdesýden keiin kásipker Baqytjan Qudiiarov osylai dep pikir bildirdi, dep habarlaidy QazAqparat.
«Prezidenttiń áleýmettik kásipkerlermen kezdesýi burynnan josparlanǵan. Mundaǵy maqsat - Memleket basshysyn bizdiń jetistikterimiz, sondai-aq jumysymyzdaǵy qiyndyqtar týraly habardar etý. Bizdiń jobalarymyzdyń basty maqsaty - múmkindigi shekteýli jandardy jumyspen qamtyp, olardy áleýmetke beiimdeý. Prezidentke bizdiń jumysymyz unaǵandai sezildi. Iaǵni, memlekettiń bul naryqta jalǵyz oiynshy emes ekeni, biznesmenderdiń áleýmettik kásipkerlerge ainalýǵa daiyn ekeni belgili boldy. Qasym-Jomart Toqaev memleket áleýmettik kásipkerlikti qoldaitynyna sendirip, bul úrdis múgedekterdiń ómir súrý sapasyn jaqsarta túsetinin aitty. Osyǵan bailanysty Memleket basshysy bizdi belsendi bolýǵa, óz tájiribemizdi BAQ-ta bólisýge jáne bizdiń jumysymyz týraly beinerolikter túsirýge shaqyrdy. Biz kúzde biznesmenderdi yntalandyrý úshin áleýmettik kásipkerlik boiynsha úlken forým ótkizýge kelistik. Áleýmettik kásipkerler neǵurlym kóp bolsa, múmkindigi shekteýli adamdardyń múmkindigi joǵarlaidy», - dedi Baqytjan Qudiiarov.
Kásipker múmkindigi shekteýli jandar arasynda táýeldilik psihologiiasynyń tómendep bara jatqanyn atap ótti. Sondai-aq, áleýmettik kásipkerlik mundai tulǵalardyń quqyqtyq qabiletin arttyrýǵa yqpal etedi.
Atap aitqanda, Baqytjan Qudiiarov densaýlyǵynda aqaýy bar adamdardy biriktirýge baǵyttalǵan áleýmettik kásiporyn - eki dámhana ashqan. Osy eki kafede barlyǵy 27 adam jumys isteidi. Kafelerdiń birine Almaty qalasynyń Memlekettik aktivter basqarmasy úi-jai bólse, ekinshisine «Trafigýra Fondeishn» qory qarjylai kómek kórsetedi.
Baqytjan Qudiiarovtyń aitýynsha, áleýmettik kásipkerlerdiń ózekti máseleleri - úi-jailardy jalǵa berý jáne ónimdi ótkizý. Memleket basshysymen kezdesý barysynda kásipkerler atalǵan máseleler boiynsha kómek surap ótinish bildirgen. Óz kezeginde Prezident bul ótinishti qaraýǵa ýáde berip otyr.
Eske salsaq, Memleket basshysy Qasym-Jomart Toqaev áleýmettik kásipkerlik ókilderimen kezdesti.
.jpeg)