Foto: Aqorda
Prezident álemge belgili kásipker jáne jasandy intellekt salasyndaǵy sarapshy Li Kai-Fýdy qabyldady, dep habarlaidy Ult.kz.
"Memleket basshysy Sinovation Venture jasandy intellekt institýtynyń prezidenti, doktor Li Kai-Fýmen kezdesýde ozyq tehnologiialardy engizýdiń strategiialyq mańyzyn atap ótti. Sondai-aq álemdegi jetekshi sarapshylarmen tájiribe almasý tsifrlyq transformatsiiadaǵy órshil maqsattarǵa qol jetkizýge yqpal etetinin aitty.
Qasym-Jomart Toqaev pen Li Kai-Fý jasandy intellektti bilim, densaýlyq saqtaý, energetika jáne qoǵamdaǵy basqa da túrli salalarda paidalaný boiynsha pikir almasty.
Qytai men AQSh elderinde jasandy intellekt salasyn damytýda jáne baǵdarlamalyq ónimder ázirleýde bai tájiribesi bar Li Kai-Fý Qazaqstannyń IT bastamalardy engizý, básekege qabiletti tehnologiialyq ekojúie qurý isindegi áleýetin joǵary baǵalady" delingen habarlamada.
