Memleket basshysy Álihan Bókeihan, Ahmet Baitursynuly jáne Mirjaqyp Dýlatuly syndy ultymyzdyń uly tulǵalaryna arnalǵan eskertkishtiń saltanatty ashylý rásimine qatysty, dep habarlaidy "Ult aqparat" Aqordaǵa silteme jasap.
Eskertkishti ashqan Qasym-Jomart Toqaev Alash qairatkerleriniń memorialyna gúl shoǵyn qoiyp, saltanatty sharaǵa qatysýshylardyń aldynda sóz sóiledi.
Prezident Alash arystaryna arnalǵan eskertkishtiń Táýelsizdigimizdiń 30 jyldyǵy men Elorda kúnine orai ashylýynyń simvoldyq máni zor ekenin atap ótti.
– Álihan – Alashorda úkimetin basqarǵan memleket qairatkeri. Ahmet – halqymyzdy bilim men ǵylymǵa jetelep, rýhani ustaz bolǵan áigili aǵartýshy. Mirjaqyp – ult birligi uranyna ainalǵan «Oian qazaq» pen tuńǵysh qazaq romanynyń avtory, kórnekti qalamger. Úsh qairatker de – biregei tarihi tulǵalar. Bul eskertkish – barsha Alash ardaqtylaryna degen qurmetimizdiń kórinisi, – dedi Qasym-Jomart Toqaev.
Memleket basshysy «Alash» sóziniń qasterli uǵym ekenin atap ótip, Alash qairatkerleriniń halyqtyń rýhyn oiatý jolyndaǵy qajyrly eńbegine toqtaldy.
– «Alash» sózi – halqymyz úshin qashanda qasietti uǵym. Ótken ǵasyrdyń basynda ultymyzdyń bas kóterer azamattary Alash ideiasynyń tóńiregine birikti. Olar eliniń azattyǵy men órkendeýi jolynda qyzmet etti. Halyqtyń rýhyn oiatyp, sanasyna silkinis ákeldi. Jerimizdiń tutastyǵynyń saqtalýyna yqpal etti. Tól ádebietimiz ben mádenietimizdi buryn-sońdy bolmaǵan deńgeige kóterdi. Órkenietti ziialylyqtyń negizin qalady. Alash arystary zamannyń syn-qaterine qaramai, Qazaq eliniń memleketshildik ideiasyn jańǵyrtty, – dedi Prezident.
Qasym-Jomart Toqaev Táýelsizdiktiń arqasynda uzaq jyldar boiy halyq jaýy atanyp, qýǵyn-súrginge ushyraǵan Alash arystarynyń eńbekteri laiyqty baǵasyn alyp, olardyń esimderi qaita jańǵyryp jatqanyna toqtaldy.
– Ókinishke qarai, túgelge jýyǵy halyq jaýy atanyp, qýǵyn-súrgin qurbany boldy. Eńbekteri joiyldy, uzaq jyldar boiy olardyń atyn ataýǵa tyiym salyndy. Biraq, ultymyz uly perzentteriniń esimin sanasynan óshirmei, jadynda saqtai bildi. Táýelsizdik jyldarynda Alash ideiasy men Alash murasy túbegeili qaita qaraldy. Osydan birneshe jyl buryn «Alash» avtonomiiasynyń 100 jyldyǵyn atap óttik. Biyl Álihan Bókeihannyń 155 jyldyǵy Táýelsizdik merekesi aiasynda ótip jatyr. Biz Alash arystarynyń esimin jańǵyrtyp, tarihi róline baǵa berýdi qolǵa aldyq. Meniń Jarlyǵymmen Saiasi qýǵyn-súrgin qurbandaryn tolyq aqtaý jónindegi memlekettik komissiia quryldy, – dedi Memleket basshysy.
Prezident óz sózinde Alash qairatkerleriniń eńbekteri Alashtaný ǵylymynyń aiasynda jan-jaqty zerttelý qajettigine nazar aýdardy.
– Alashtaný ǵylymy arystarymyzdyń eńbekterin barynsha qamtýy kerek, – Memleket basshysy.
Jyl ótken saiyn Alashtyń abyroiy asqaqtap, bedeli biiktei beredi. Olardyń atqarǵan isi eshqashan mańyzyn joǵaltpaidy. Sebebi, ult múddesi, el qamy degen uǵymdar – máńgi qundylyqtar, – dedi Qasym-Jomart Toqaev.
Jiyn sońynda Memleket basshysy Alash qairatkerleriniń derbes memleket bolyp, jer júzimen terezesi teń qatynas ornatý jónindegi arman-maqsaty júzege asqanyn atap ótip, elimiz búginde álem qaýymdastyǵynyń beldi múshesine ainalǵanyn aitty.
