Qazaqstan Prezidenti Qasym-Jomart Toqaev «Táýelsizdik bárinen qymbat» atty maqalasynda Alash arystaryna qatysty pikir bildirdi, dep habarlaidy "Ult aqparat".
«Biz kezinde elge qyzmet etýdiń ozyq úlgisin kórsetken Alash qairatkerlerinen taǵylym alamyz. Olar ótken ǵasyrdyń basynda táýelsizdik ideialaryn halyq arasynda dáripteýge zor eńbek sińirip, azattyq jolynda qurban boldy. Táýelsizdigimizdiń mereitoiy aiasynda osyndai birtýar tulǵalardy eske alyp, olardyń murasyn jastarymyzǵa jáne búkil álemge pash etýimiz kerek. Sonymen birge, osy taqyrypty zerttep júrgen ǵalymdar men jazýshylardyń da eńbegi qoldaýǵa ie bolýy jáne baǵalanýy qajet» dep atap ótti Memleket basshysy.
Onyń aitýynsha, Alash arystarynyń asyl murasyn igerý jalǵasa berýge tiis.
«Milliondaǵan adamdy qazaǵa ushyratyp, tiri qalǵanyn jan saýǵalap bosyp ketýge májbúr etken alapat asharshylyqtyń alǵashqy kezeńi – 1921-1922 jyldardaǵy náýbetten beri 100 jyl ótti. Sol zulmattyń kesirinen qyrylyp qalmaǵanda, halqymyzdyń sany qazirgiden áldeneshe ese kóp bolar edi. Tarihymyzdyń osy aqtańdaq betteri áli kúnge deiin jan-jaqty zerttelmei keledi. Tipti, ǵalymdardyń arasynda asharshylyq qurbandarynyń naqty sany týraly ortaq paiym joq. Ala-qula derekter jáne onyń sebep-saldary jaily ártúrli kózqarastar qoǵamdy adastyrady. Tiisti tarihi qujattardy, jinalǵan málimetterdi asa muqiiat zerdeleý kerek. Bilikti mamandar júieli zertteýmen ainalysyp, soǵan sáikes asharshylyq máselesine memleket tarapynan baǵa berilgeni jón. Biz bul kúrdeli máselege ustamdylyqpen jáne jaýapkershilikpen qaraýymyz qajet. Jalpy, tarihi zertteýlerdi uranshyldyq pen dańǵazasyz, taza ǵylymi ustanymmen júrgizgen durys» deidi Qasym-Jomart Toqaev.
