Foto: Aqorda
Memleket basshysy aqyn, Qazaqstannyń Halyq jazýshysy Temirhan Medetbektiń otbasy men jaqyn týystaryna kóńil aitý jedelhatyn joldady. Bul týraly Aqorda málim etti.
Prezident Qasym-Jomart Toqaev aqyn, Qazaqstannyń Halyq jazýshysy, Memlekettik syilyqtyń laýreaty, «Qurmet» jáne «Parasat» ordenderiniń iegeri, qoǵam qairatkeri Temirhan Medetbektiń dúnieden ótýine bailanysty onyń otbasy men jaqyn-jýyqtaryna kóńil aitty.
– Temirhan Medetbek ǵibratty ǵumyryn ult rýhaniiatyna arnaǵan, tól ádebietimiz ben ónerimizdiń janashyry bolǵan tegeýrindi aqyn edi. Kóne túrki sarynyn jańǵyrtqan rýhty shyǵarmalary oqyrman tarapynan joǵary baǵalandy. Qazaq baspasóziniń órkendeýine eleýli eńbek sińirip, naǵyz shyǵarmashyl tulǵa retinde ónegeli ómir súrdi. Sońyna ádebi bai mura qaldyrǵan Temirhan Medetbektiń jarqyn beinesi men esimi umytylmaidy, – delingen jedelhatta.
Eske sala keteiik, Qazaqstannyń halyq jazýshysy, kórnekti aqyn Temirhan Medetbek dúnieden ozdy. Qaraly habardy Jazýshylar odaǵy basqarma tóraǵasynyń orynbasary Qasymhan Begmanov jariialady.
