Memleket basshysy Qytaidyń Qazaqstandaǵy elshisi Chjan Siaony qabyldady, dep habarlaidy "Ult aqparat" Aqordanyń resmi saityna silteme jasap.
Prezident Qasym-Jomart Toqaev daǵdarystan keiingi kezeńde Qazaqstannyń Qytai Halyq Respýblikasymen kópjaqty strategiialyq seriktestigin odan ári damytýǵa qatysty naqty ustanymyn jetkizdi.
«Qazaqstan men QHR arasyndaǵy ózara yntymaqtastyq pen strategiialyq seriktestik ártúrli saiasi tendentsiialarǵa emes, berik negizge qurylǵan. Qazaqstan men Qytai – jaqyn kórshi, senimdi dos jáne strategiialyq áriptes. Bul yntymaqtastyq Qazaqstannyń ulttyq múddesine sai keledi. Elderimizdiń arasyndaǵy barlyq másele syndarly ári senimdi dialog arqyly sheshiledi», – dedi Memleket basshysy.
QHR Tóraǵasy Si Tszinpinge ystyq sálemin joldaǵan Qazaqstan Prezidenti qytai basshysyn ózine yńǵaily ýaqytta elimizge memlekettik saparmen kelýge shaqyrdy. Qasym-Jomart Toqaev Qazaqstan men Qytaidyń COVID-19 pandemiiasy bastalǵannan bergi bir-birine kórsetken ózara kómegin joǵary baǵalady. Kezdesýde Qazaqstannyń qytaidan vaktsina alýdy josparlap otyrǵany, reseilik «Spýtnik V» ekpesimen jáne otandyq «QazVac» vaktsinasyn qoldaný arqyly Úkimettiń halyqqa jappai ekpe salý jumysy ekpindi túrde iske asatyny aityldy.
Biyl Qazaqstannyń Táýelsizdik alǵanyna jáne Qazaqstan men Qytai arasyndaǵy diplomatiialyq qatynastardyń ornaǵanyna 30 jyl tolyp otyr. Memleket basshysynyń pikirinshe, alda kele jatqan osynaý mereitoilyq mezet buǵan deiin júrip ótken joldyń salmaǵyn uǵynýǵa, strategiialyq seriktestiktiń jańa maqsattaryn anyqtaýǵa jaqsy múmkindik beredi. Qasym-Jomart Toqaev osy ýaqyt aralyǵynda eki el óziniń damý jolynda, sondai-aq, jan-jaqty yntymaqtastyqty nyǵaitýda aitarlyqtai nátijelerge qol jetkizdi dep sanaidy.
Memleket basshysy qytai halqyn eldegi kedeilikti túp tamyrymen joiý jónindegi tarihi mindetti oryndaýymen, koronavirýs indetimen kúrestegi jeńisimen jáne ekonomikany qaita qalpyna keltirýdegi úlken jetistigimen quttyqtady.
Prezident Qazaqstannyń joǵary deńgeidegi saiasi bailanystardy nyǵaitýǵa, ekonomikalyq qarym-qatynastardy keńeitýge ázir ekenin rastady. QHR – Qazaqstannyń eń iri syrtqy saýda seriktesi. 2020 jyly eki el arasyndaǵy taýar ainalymy 15 milliard dollardy qurady.
Ekijaqty saýda jáne investitsiialyq bailanystardy ornyqty jáne teńgerimdi damý deńgeiine shyǵarý úshin Memleket basshysy Qazaqstan-Qytai shekarasyndaǵy avtomobil jáne temirjol ótkizý pýnktteriniń jumysyn qalypty rejimge qaitarýǵa, pandemiiadan keiingi kezeńde olardyń ótkizý qabiletin arttyrýǵa qatysty usynystar aitty. Prezident azamattar men júk tasymaldaityn turaqty áýe reisterin qaita qalpyna keltirýge múmkindik bar dep sanaidy. Tsifrlandyrý, jasyl ekonomika, innovatsiia sekildi salalar boiynsha aitarlyqtai jetistikke jetken Qytai tarapymen yntymaqtastyqty damytý úshin ekijaqty kúsh-jigerdi jumyldyrý asa mańyzdy.
Qasym-Jomart Toqaev Qazaqstannyń «Nurly jol» strategiiasyn Qytaidyń «Bir beldeý jáne bir jol» bastamasymen ushtastyrý jónindegi jumysty jandandyrý qajettigin atap ótti. Sondai-aq Qazaqstannyń 2025 jylǵa deiingi damýynyń ulttyq josparynan jáne qytaidyń «Qos ainalym» tujyrymdamasynan týyndaityn ózara tiimdi kooperatsiiany tereńdetý múmkindikterin tolyqqandy paidalanýǵa shaqyrdy.
Memleket basshysy halyqaralyq deńgeidegi basty máseleler boiynsha Qazaqstan men Qytaidyń ustanymdary sáikes keletinin aitty. Prezident Aziiadaǵy ózara yqpaldastyq jáne senim sharalary keńesin qoldaǵany úshin qytai tarapyna rizashylyǵyn bildirip, Birikken Ulttar Uiymy, Shanhai yntymaqtastyq uiymy sheńberinde jáne «Ortalyq Aziia + Qytai» yntymaqtastyq formatynda da odan ári birlesip jumys isteýge Qazaqstannyń daiyn ekenin jetkizdi.
