- QR Memlekettik qyzmet isteri jáne sybailas jemqorlyqqa qarsy kúres agenttiginiń búgingi keńeitilgen májilisine qatysqan Prezident Ákimshiliginiń basshysy Ádilbek Jaqsybekov uzaq ýaqyt boiy bos oryndardy ustap, jumysqa adam almai jatqan ministrlikterdi synǵa aldy. Onyń oiynsha, atalǵan memlekettik organdar rezervte bar adamdardy qyzmetke qoiýǵa asyqpasa, ondai vedomstvonyń shtatyn qysqartýǵa ábden bolady, dep xabarlaidy Ult.kz tilshisi QazAqparat agenttigine silteme jasap.
"Maǵan túsken aqparatqa sáikes, "A" korpýsyndaǵy vakanttyq qyzmetterge (basshylyq - avt.) adam taǵaiyndaý jumysy durys júrgizilmeidi. Qazirgi kezde rezervtiń baryna qaramastan, 16 laýazym áli de bos tur. Tórt ai boiy alty birdei ministrlikte 8 komitettiń tóraǵasy áli taǵaiyndalmai otyr. Al osy qyzmetke úmitkerlerdiń rezervi 39 adamdy qurap otyr", - dedi Á.Jaqsybekov.
Onyń aitýynsha, memlekettik qyzmet salasynda mamandardyń jii aýysýy basty problemalardyń biri bolyp otyr. Soǵan qaramastan, qarjy ministrliginde 970 qyzmet orny bos tursa, ulttyq ekonomika ministrliginde - 900-den astam, al aýyl sharýashylyǵy ministrliginde 280 qyzmetke áli adam ala qoimaǵan. Oblystyq jáne aýdandyq ákimdikterde de solai bolyp tur.
"Negizi, bos turǵan jumys oryndarynyń kóptigi, basshylardyń jii aýysýy memlekettik qyzmet apparatynyń jumysyna keri áserin tigizip otyr. Bizge osyny jan-jaqty zerdelep shyǵý qajet. Qazirgi jaǵdaiǵa ne sebep boldy? Nege ol oryndar bos tur? Bálkim, sol ministrlikterdiń shtatyn qysqartamyz. Sonyń arqasynda biraz aqshany únemdeýge bolady", - dep atap kórsetti Prezident Ákimshiliginiń basshysy.
