Qazaqstan Prezidenti Qasym-Jomart Toqaev elorda ákimine kórshiles oblystardyń taýar óndirýshilerimen tikelei bailanys ornatýdy tapsyrdy, dep habarlaidy Sputnik Qazaqstan.
Memleket basshysy Nur-Sultan qalasynda azyq-túlik pen kúndelikti ómirge qajetti taýarlar qymbat ekenin atap ótti.
"Bul belgili másele. Máselen, un baǵasy eldegi ortasha baǵadan 18,2%-ke, súzbe 17%-ke, piiaz 14,5%-ke, kúnbaǵys maiy 9,6%-ke, siyr eti 6,7%-ke joǵary. Bul - qalada tiisti infraqurylym joq degen sóz. Saýda oryndary tapshy. Uiymdastyrýshylar kóbine belgili bir saýdagerlerge ǵana múmkindik beredi. Iaǵni bárine birdei jaǵdai jasalmaidy. Elorda ákimdigi men kórshiles oblystar arasyndaǵy bailanys óz deńgeiinde emes", - dedi Prezident astanany odan ári damytý máseleleri jónindegi jiynda.
Toqaev Nur-Sultan qalasynyń ákimine Aqmola, Qaraǵandy jáne Pavlodar oblystarynyń basshylarymen birlesip, taýar óndirýshiler men saýda jelileri arasynda tikelei bailanys ornatý máselesin retteýdi tapsyrdy.
"Elordanyń damýy irgeles eldi mekenderdiń damýymen tyǵyz bailanysty. Qala mańyndaǵy aýyl-aimaqtar elordanyń azyq-túlik beldeýi retinde jumys isteýi tiis. Ol jerlerge túrli óndiris, kásiporyndardy ornalastyrǵan abzal. Osyǵan bailanysty Nur-Sultan qalasy men Aqmola oblysynyń ákimderine damytý josparyn úilestirýdi tapsyramyn. Óitkeni eki óńir de bir aglomeratsiiaǵa kiredi", - dedi memleket basshysy.
Prezident bul másele talai jiynda sóz bolǵanyn atap ótti.
"Búgin osy tapsyrmany taǵy da qaitalaýǵa týra kelip otyr. Endi oryndalady degen úmittemin. Sonshalyqty qiyn másele de emes. Bastysy niet pen biliktilik bolýy tiis. Bizge jetpei turǵany da osy", - dedi Toqaev.
