QR Memlekettik hatshysy Erlan Qarin konstitýtsiialyq reforma aiasynda ákimderdi sailaý jáne taǵaiyndaý tártibi qalai ózgeretinin málim etti, dep habarlaidy QazAqparat.
«Oblys ákimderin taǵaiyndaýdyń jańa tásili engiziledi. Ákimderdi óńirdegi búkil máslihat depýtattarynyń kelisimi boiynsha balamaly negizde taǵaiyndaý usynylyp otyr. Bul qalai jumys isteidi? Prezident oblys, respýblikalyq mańyzy bar qala jáne elorda ákiminiń laýazymyna kem degende eki úmitker usynýǵa mindetti. Oblystyq, aýdandyq jáne qalalyq máslihat depýtattarynyń bári osy úmitkerlerden tańdaý jasaidy. Ákimdikke laiyqty kandidat depýtattardyń jalpy daýys berýi nátijesinde taǵaiyndalady. Iaǵni, ákimshilik senim bildirgen azamat ákim bolady», - dedi Memlekettik hatshy Youtube arnasynda.
Onyń sózine qaraǵanda atalǵan túzetýlerdiń arqasynda ákimderdiń derbestigi artýy kerek.
«Qazir aýyl ákimderin turǵyndar tikelei sailaidy. Bul turaqty úrdiske ainaldy. Endi aýdan jáne qala ákimderin sailaýǵa daiyndyq júrgizilip jatyr. Oblys ákimderin depýtattar daýys berý arqyly balamaly negizde sailaitynyn buǵan deiin aittyq. Sondai-aq, Prezidenttiń aýdan, qala, aýyl ákimderin laýazymynan bosatý quzyretin Konstitýtsiiadan alyp tastaý usynylady. Tipti Prezidenttiń oblys, respýblikalyq mańyzy bar qala jáne elorda ákimderiniń aktilerin tolyǵymen nemese ishinara joiý, toqtatý quzyretin de alyp tastaý usynylyp otyr. Sonyń nátijesinde ákimder barynsha derbes jumys isteidi, turǵyndardyń múddesine basymdyq beredi», - dedi Erdan Qarin.
