Foto: Aqorda
Prezidentke ministrliktiń mádeniet, aqparat, azamattyq qoǵam, din, etnosaralyq qatynas, jastar saiasaty, kreativti indýstriia, otbasy-demografiialyq saiasat, muraǵat jáne kitaphana isi salalarynda biylǵy atqarǵan sharalary, sondai-aq vedomstvonyń 2025 jylǵa arnalǵan perspektivti josparlaryn júzege asyrýǵa daiyndyǵy jóninde málimet berildi.Aida Balaevanyń aitýynsha, biyl alǵash ret qazaq óneri álemge áigili art-alańdarda, atap aitqanda, Venetsiia biennalesinde, Gime Aziia óneri mýzeiinde tanystyryldy. Qazaqstannyń baspa ónimderi Frankfýrt kitap jármeńkesinde kórsetildi.
Segiz tilde Qazaq sulture aqparattyq-aǵartýshylyq platformasyn iske qosý elimizdiń tarihyn, mádenietin jáne salt-dástúrin dáripteý turǵysynan mańyzdy jobaǵa ainaldy. Budan bólek, Astanada ótken V Dúniejúzilik kóshpendiler oiyndarynyń ashylý jáne jabylý saltanaty aitýly mádeni-buqaralyq is-shara retinde baǵalandy.
Qasym-Jomart Toqaevqa ministrliktiń zań jobalaryn ázirleý baǵytynda atqarǵan jumysy týraly baiandaldy. Atap aitqanda, biyl elimizde jýrnalisterdiń mártebesin arttyrýdy kózdeitin jańa BAQ týraly zań qabyldandy. «Qazaqfilm» kinostýdiiasyn tikelei qarjylandyrýdy qarastyratyn zańnamalyq ózgerister Parlament qaraýyna usynyldy.
Memleket basshysyna eriktiler qozǵalysyn damytý sharalary jóninde esep berildi. Ministrdiń aitýynsha, 2022 jylmen salystyrǵanda, belsendi eriktiler sany 240 myń adamǵa deiin artty. Jyl saiyn 50-den astam volonterlik joba júzege asyrylady, sondai-aq 7 qazaqstandyq erikti BUU qurylymdaryna jiberildi.
Aida Balaeva kreativti indýstriiany qoldaý sharalary ázirlengenin jetkizdi. Olardyń qatarynda Kreativti indýstriia qoryn qurý, ortalyq jáne jergilikti atqarýshy organdardyń quzyretin keńeitý bastamalary bar. Kreativti indýstriia sýbektilerine arnaiy salyq rejimi engizildi. Jyl basynan beri elimizde 10 kreativti ortalyq pen hab ashyldy.
Kezdesý sońynda Prezident kelesi jyly ótetin Qazaqstan halqy Assambleiasynyń 30 jyldyǵy, Uly Jeńistiń 80 jyldyǵy, Álemdik jáne dástúrli dinder kóshbasshylarynyń sezi sekildi mereitoilyq ári mańyzdy is-sharalarǵa daiyndyq barysyn jiti baqylaýǵa alýdy tapsyrdy.
