Foto: Akorda.kz
Memleket basshysy Ádilet ministri Azamat Esqaraevty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Prezidentke ádilet organdary qyzmetiniń nátijeleri jáne aldaǵy kezeńge arnalǵan jospary týraly esep berilip, reforma júrgiziletin baǵyttar tanystyryldy.
Ministr Qylmystyq jáne Qylmystyq-protsestik kodeksterdi tekserýdiń aiaqtalǵanyn málimdedi. Osy rette 1000-nan astam bap pen 1200 usynysqa taldaý júrgizildi. Nátijesinde azamattar men kásipkerler quqyqtarynyń qorǵalýyn kúsheitý máselelerin eskeretin jáne biznesti negizsiz qylmystyq qýdalaýǵa jol bermeitin tiisti zań jobasy ázirlendi.
Azamat Esqaraevtyń aitýynsha, zańnamanyń sapasyn arttyrý úshin keshendi sharalar qabyldanyp jatyr. Atap aitqanda, zań jobasy qyzmeti máseleleri jónindegi vedomstvoaralyq komissiianyń jumysyn jandandyrý, ǵalymdardy keńinen tarta otyryp, zańnamanyń turaqtylyǵyn qamtamasyz etý, reformalardy aqparattyq turǵyda qoldaýdy kúsheitý jónindegi is-sharalardy júzege asyrý kózdelgen.
Sonymen qatar Prezident Ádilet ministrligine qarasty máseleler men kórsetiletin memlekettik qyzmetterdi avtomattandyrý jáne tsifrlandyrý sharalaryn qamtityn 12 jobamen tanysty.
Kezdesý sońynda Qasym-Jomart Toqaev ministrlikke júktelgen mindetterdiń sapaly iske asyrylýynyń mańyzdylyǵyna nazar aýdaryp, zańnamany odan ári jetildirýge jáne azamattardyń quqyqtaryn qorǵaýdy kúsheitýge baǵyttalǵan birqatar tapsyrma berdi.
