Foto: Akorda.kz
Memleket basshysy Adam quqyqtary jónindegi ýákil Artýr Lastaevty qabyldady, dep habarlaidy "Ult aqparat" Aqordanyń resmi saityna silteme jasap.
Kezdesý barysynda konstitýtsiialyq reformaǵa sáikes, Konstitýtsiialyq Sot pen Joǵarǵy Sotqa júginý arqyly azamattardyń quqyqtaryn qamtamasyz etýge baǵyttalǵan Adam quqyqtary jónindegi ýákildiń jańa ókilettikteri, sondai-aq Bas prokýratýramen ózara is-áreket máselesi talqylandy.
Prezident qylmystyq is boiynsha sot tóreligi men jazanyń oryndalý barysynda azamattarǵa beriletin konstitýtsiialyq kepildikti kúsheitý úshin sot júiesi men quqyq qorǵaý organdarynyń naqty sharalar qabyldaýy mańyzdy ekenine nazar aýdardy.
Kezdesý sońynda Qasym-Jomart Toqaev Ombýdsmen institýtyn odan ári damytýǵa jáne onyń áleýetin nyǵaitýǵa baǵyttalǵan basym mindetterdi atap ótip, adam jáne azamat quqyqtarynyń buzylmaýyna beriletin konstitýtsiialyq kepildikti odan ári kúsheitý jóninde birqatar tapsyrma berdi.
