Prezident elimizdiń áielder qaýymyn halyqaralyq merekemen quttyqtady, dep habarlaidy "Ult aqparat" Aqordaǵa silteme jasap.
«Qymbatty hanymdar!
Sizderdi Halyqaralyq áielder kúnimen shyn júrekten quttyqtaimyn!
Osynaý shýaqty kóktem merekesi ásemdik pen ádemiliktiń, meiirim men mahabbattyń simvolyna ainaldy. Halqymyzdyń «Áiel bir qolymen besikti terbetse, bir qolymen álemdi terbetedi» degen naqyl sóziniń tereń mán-mańyzy bar.
Qazaqstanda áielderge barlyq jaǵdai jasalǵan. Olar bilim berý men densaýlyq saqtaý, mádeniet pen sport, óndiris pen quqyq qorǵaý jáne basqa da salalarda tabysty eńbek etýde.
Memlekettik organdar men iri kompaniialarda basshylyq qyzmet atqaratyn nemese biznes salasynda kásibin órkendetip júrgen áielderimiz az emes. Qyz-kelinshekter elimizdiń qoǵamdyq-saiasi ómirine de belsene atsalysýda.
Óskeleń urpaqqa ónegeli tálim-tárbie berý isinde áielder airyqsha ról atqarady. Asyl analardyń eńbegi qandai qurmetke de laiyq.
Kez-kelgen iste áielderdiń kásibi biliktiligi pen jaýapkershiligi aiqyn ańǵarylady. Olar barlyq ortada úndestik pen úilesimdi, ózara túsinistik pen tatýlyqty nyǵaitýǵa uiytqy bolady.
Bizdiń elimiz saiasi ózgerister men júieli jańǵyrý kezeńine qadam basty. Osy oraida, áielder qaýymynyń jasampazdyq qasieti men kúsh-qýaty Jańa Qazaqstannyń ilgerileýine septigin tigizedi dep senemin.
Barshańyzǵa zor densaýlyq, baq-bereke tileimin!» - delingen habarlamada.
